mizhgan-e-tar hun ya rag-e-tak-e-burida hun

mizhgān-e-tar huuñ yā rag-e-tāk-e-burīda huuñ

jo kuchh ki huuñ so huuñ ġharaz āfat-rasīda huuñ

khīñche hai duur aap ko merī farotanī

uftāda huuñ pa sāya-e-qadd-e-kashīda huuñ

har shaam misl-e-shām huuñ maiñ tīra-rozgār

har sub.h misl-e-sub.h garebāñ-darīda huuñ

kartī hai bū-e-gul tū mire saath iḳhtilāt

par aah maiñ to mauj-e-nasīm-e-dazīda huuñ

tū chāhtī hai to tapish-e-dil ki ba.ad-e-marg

kunj-e-mazār meñ bhī na maiñ ārmīda huuñ

ai 'dard' jā chukā hai mirā kaam zabt se

maiñ ġham-zada to qatra-e-ashk-e-chakīda huuñ

mizhgan-e-tar hun ya rag-e-tak-e-burida hun

jo kuchh ki hun so hun gharaz aafat-rasida hun

khinche hai dur aap ko meri farotani

uftada hun pa saya-e-qadd-e-kashida hun

har sham misl-e-sham hun main tira-rozgar

har subh misl-e-subh gareban-darida hun

karti hai bu-e-gul tu mere sath iKHtilat

par aah main to mauj-e-nasim-e-dazida hun

tu chahti hai to tapish-e-dil ki baad-e-marg

kunj-e-mazar mein bhi na main aarmida hun

ai 'dard' ja chuka hai mera kaam zabt se

main gham-zada to qatra-e-ashk-e-chakida hun