mizhgan wo jhapakta hai ab tir hai aur main hun

mizhgāñ vo jhapaktā hai ab tiir hai aur maiñ huuñ

sar paañv se chhidne kī tasvīr hai aur maiñ huuñ

kahtā hai vo kal tere purze maiñ uḌāūñgā

ab sub.h ko qātil kī shamshīr hai aur maiñ huuñ

be-jurm-o-ḳhatā jis kā ḳhuuñ hove ravā yaaro

us ḳhūbi-e-qismat kā naḳhchīr hai aur maiñ huuñ

hai qatl kī dhun us ko aur merī nazar haq par

tadbīr hai aur vo hai taqdīr hai aur maiñ huuñ

dil TuuTā 'nazīr' ab to do-chār baras ro kar

is qasr-e-shikasta kī ta.amīr hai aur maiñ huuñ

mizhgan wo jhapakta hai ab tir hai aur main hun

sar panw se chhidne ki taswir hai aur main hun

kahta hai wo kal tere purze main uDaunga

ab subh ko qatil ki shamshir hai aur main hun

be-jurm-o-KHata jis ka KHun howe rawa yaro

us KHubi-e-qismat ka naKHchir hai aur main hun

hai qatl ki dhun us ko aur meri nazar haq par

tadbir hai aur wo hai taqdir hai aur main hun

dil TuTa 'nazir' ab to do-chaar baras ro kar

is qasr-e-shikasta ki tamir hai aur main hun