motaqid is bar shayad surKH-ru hone ko hai

mo'taqid is baar shāyad surḳh-rū hone ko hai

dost thā jo ab talak vo bhī 'adū hone ko hai

dar khule jaate haiñ gum-gashta makīnoñ kī taraf

har kisī ko apnī apnī justujū hone ko hai

parbatoñ kī shakl meñ tabdīl hotā hai dhuāñ

kyā koī aaseb mere rū-ba-rū hone ko hai

surḳhiyoñ meñ Dhaltī jaatī hai siyāhī dam-ba-dam

rafta rafta saarā hī paanī lahū hone ko hai

vahm kī tā.īd kartī hai havāoñ kī namī

pyaas ke māroñ pe zāhir aabjū hone ko hai

sa'i-e-lā-hāsil se bhī hāsil huā hai vo mujhe

jis kī sab zinda-diloñ ko aarzū hone ko hai

ik zamāne baa'd 'rāhat' hosh meñ aayā huuñ maiñ

ik zamāne baa'd ḳhud se guftugū hone ko hai

mo'taqid is bar shayad surKH-ru hone ko hai

dost tha jo ab talak wo bhi 'adu hone ko hai

dar khule jate hain gum-gashta makinon ki taraf

har kisi ko apni apni justuju hone ko hai

parbaton ki shakl mein tabdil hota hai dhuan

kya koi aaseb mere ru-ba-ru hone ko hai

surKHiyon mein Dhalti jati hai siyahi dam-ba-dam

rafta rafta sara hi pani lahu hone ko hai

wahm ki taid karti hai hawaon ki nami

pyas ke maron pe zahir aabju hone ko hai

sa'i-e-la-hasil se bhi hasil hua hai wo mujhe

jis ki sab zinda-dilon ko aarzu hone ko hai

ek zamane ba'd 'rahat' hosh mein aaya hun main

ek zamane ba'd KHud se guftugu hone ko hai