mohabbat bahr-e-atish hai na utra jae hai mujhse

mohabbat bahr-e-ātish hai na utrā jaa.e hai mujh se

magar dariyā meñ rah kar bhī na tarsā jaa.e hai mujh se

tabī.at hī kahāñ maane hai be tum se mile hamdam

ye vaqt-e-lutf tanhā kab guzārā jaa.e hai mujh se

ta.alluq bhī ajab rishta hai do dil jis se milte haiñ

na joḌā jaa.e hai us se na toḌā jaa.e hai mujh se

maiñ hilte dekhtā huuñ yuuñ to donoñ lab kabhī us ke

magar āhista aisā kuchh na samjhā jaa.e hai mujh se

itaab us āfat-e-jāñ kā sitam us fitna-paikar kā

agar hai dīdanī phir kyoñ na dekhā jaa.e hai mujh se

za.īfī aa ga.ī aisī ki māhir kyā kahūñ tum se

agar baiThā kabhī to phir na uTThā jaa.e hai mujh se

mohabbat bahr-e-atish hai na utra jae hai mujh se

magar dariya mein rah kar bhi na tarsa jae hai mujh se

tabiat hi kahan mane hai be tum se mile hamdam

ye waqt-e-lutf tanha kab guzara jae hai mujh se

talluq bhi ajab rishta hai do dil jis se milte hain

na joDa jae hai us se na toDa jae hai mujh se

main hilte dekhta hun yun to donon lab kabhi us ke

magar aahista aisa kuchh na samjha jae hai mujh se

itab us aafat-e-jaan ka sitam us fitna-paikar ka

agar hai didani phir kyon na dekha jae hai mujh se

zaifi aa gai aisi ki mahir kya kahun tum se

agar baiTha kabhi to phir na uTTha jae hai mujh se