mohabbat ghazal hai ibaadat ghazal hai

mohabbat ġhazal hai ibādat ġhazal hai

ġhazal ma.arifat hai sharī.at ġhazal hai

ġhinā zīrakī aur latāfat ġhazal hai

qasam le lo kasrat meñ vahdat ġhazal hai

taḳhayyul tasavvur tashāboh tavāzun

is arba.a kī yakjā.ī sūrat ġhazal

har ik band har masnavī tuul qāmat

ġhazal arz o jauhar hai qīmat ġhazal hai

ḳhudī ko liye be-ḳhudī ko sambhāle

itā.at ġhazal hai baġhāvat ġhazal hai

ġhazal gardish o mehvar o dā.era hai

ġhazal fard-e-vāhid hai millat ġhazal hai

baham tanz o tausīf o shukr o shikāyat

fasāhat ġhazal hai balāġhat ġhazal hai

harīfoñ se ye qaul-e-'dīvāna' kah do

ġhazal hai jo hasrat to hasrat ġhazal hai

mohabbat ghazal hai ibaadat ghazal hai

ghazal marifat hai shariat ghazal hai

ghina ziraki aur latafat ghazal hai

qasam le lo kasrat mein wahdat ghazal hai

taKHayyul tasawwur tashaboh tawazun

is arba ki yakjai surat ghazal

har ek band har masnawi tul qamat

ghazal arz o jauhar hai qimat ghazal hai

KHudi ko liye be-KHudi ko sambhaale

itaat ghazal hai baghawat ghazal hai

ghazal gardish o mehwar o daera hai

ghazal fard-e-wahid hai millat ghazal hai

baham tanz o tausif o shukr o shikayat

fasahat ghazal hai balaghat ghazal hai

harifon se ye qaul-e-'diwana' kah do

ghazal hai jo hasrat to hasrat ghazal hai