mohabbat hasil-e-kaun-o-makan bhi

mohabbat hāsil-e-kaun-o-makāñ bhī

mohabbat ek sa.ī-e-rā.egāñ bhī

ajab shai hai zabān-e-be-zabāñ bhī

ḳhamoshī bhī mukammal dāstāñ bhī

sunā hai dard hai taskīn-e-jāñ bhī

laboñ par ruk ga.ī aakar fuġhāñ bhī

faroġh-e-sho.ala-e-rang-e-chaman par

taḌap kar rah ga.ī barq-e-tapāñ bhī

fareb-e-shauq hai yā ḳhud-farebī

chaman ke saath fikr-e-āshiyāñ bhī

mirī tīra-shabī par hañsne vaalo

sahar tak hai faroġh-e-kahkashāñ bhī

mujhe dekhā to ā.īna bhī dekho

ki mere saath apnā imtihāñ bhī

nifāq-e-dushmanāñ kā tazkira kyā

nazar meñ hai ḳhulūs-e-dostāñ bhī

kahāñ jaa.e tumhāre dar se 'zaidī'

ki dushman hai zamīñ bhī āsmāñ bhī

mohabbat hasil-e-kaun-o-makan bhi

mohabbat ek sai-e-raegan bhi

ajab shai hai zaban-e-be-zaban bhi

KHamoshi bhi mukammal dastan bhi

suna hai dard hai taskin-e-jaan bhi

labon par ruk gai aakar fughan bhi

farogh-e-shoala-e-rang-e-chaman par

taDap kar rah gai barq-e-tapan bhi

fareb-e-shauq hai ya KHud-farebi

chaman ke sath fikr-e-ashiyan bhi

meri tira-shabi par hansne walo

sahar tak hai farogh-e-kahkashan bhi

mujhe dekha to aaina bhi dekho

ki mere sath apna imtihan bhi

nifaq-e-dushmanan ka tazkira kya

nazar mein hai KHulus-e-dostan bhi

kahan jae tumhaare dar se 'zaidi'

ki dushman hai zamin bhi aasman bhi