mohabbat haT rahi hai darmiyan se

mohabbat haT rahī hai darmiyāñ se

zamīñ Takrā na jaa.e āsmāñ se

vo manzil saḳht hai har imtihāñ se

mohabbat ruḳh badaltī hai jahāñ se

hazāroñ māh-o-anjum haiñ tah-e-ḳhāk

zamīñ kuchh kam nahīñ hai āsmāñ se

munavvar haiñ abhī tak vo maqāmāt

maiñ tere saath guzrā huuñ jahāñ se

zamīñ kī pastiyoñ meñ kho ga.e haiñ

zamīñ Takrāne vaale āsmāñ se

mirī āñkhoñ meñ aañsū to bahut haiñ

magar dāman tirā lā.ūñ kahāñ se

zamīñ kī ḳhaak tak de dī zamīñ ko

maiñ dāman jhaaḌ ke uTThā jahāñ se

maqām-e-āshiyāñ kī justujū meñ

guzar jā bijliyoñ ke darmiyāñ se

musalsal imtihāñ hai zindagānī

kahīñ ghabrā na jaanā imtihāñ se

banānā hai mujhe ḳhud apnī manzil

alag huuñ naqsh-pā-e-kārvāñ se

vahī duniyā ulaT dete haiñ 'shārib'

jo aksar kuchh nahīñ kahte zabāñ se

mohabbat haT rahi hai darmiyan se

zamin Takra na jae aasman se

wo manzil saKHt hai har imtihan se

mohabbat ruKH badalti hai jahan se

hazaron mah-o-anjum hain tah-e-KHak

zamin kuchh kam nahin hai aasman se

munawwar hain abhi tak wo maqamat

main tere sath guzra hun jahan se

zamin ki pastiyon mein kho gae hain

zamin Takrane wale aasman se

meri aankhon mein aansu to bahut hain

magar daman tera laun kahan se

zamin ki KHak tak de di zamin ko

main daman jhaD ke uTTha jahan se

maqam-e-ashiyan ki justuju mein

guzar ja bijliyon ke darmiyan se

musalsal imtihan hai zindagani

kahin ghabra na jaana imtihan se

banana hai mujhe KHud apni manzil

alag hun naqsh-pa-e-karwan se

wahi duniya ulaT dete hain 'shaarib'

jo aksar kuchh nahin kahte zaban se