mohabbat jab munafea ya KHasara soch kar karte

mohabbat jab munāfe.a yā ḳhasārā soch kar karte

to phir ham bhī tire dil meñ guzārā soch kar karte

tumheñ jab dil meñ rahnā thā mire to phir mire dil par

sitam karte karam karte ḳhudārā soch kar karte

sahāre kī zarūrat jab mujhe bhī thī tumheñ bhī thī

to behtar thā mujhe tum be-sahārā soch kar karte

agar pahle diyā hotā salīqe se javāb un ko

to ham par vaar dushman bhī dobāra soch kar karte

tumhāre paas bhī hotī yaqīnan ilm kī daulat

jo tum raddī kitāboñ se kinārā soch kar karte

masā.ib laakh mujh ko DhūñDhte lekin kahāñ paate

mirī qismat ke taare gar ishārā soch kar karte

agar pahle patā hotā yahāñ har chiiz faanī hai

tirī duniyā meñ ham jiinā gavāra soch kar karte

mohabbat jab munafea ya KHasara soch kar karte

to phir hum bhi tere dil mein guzara soch kar karte

tumhein jab dil mein rahna tha mere to phir mere dil par

sitam karte karam karte KHudara soch kar karte

sahaare ki zarurat jab mujhe bhi thi tumhein bhi thi

to behtar tha mujhe tum be-sahaara soch kar karte

agar pahle diya hota saliqe se jawab un ko

to hum par war dushman bhi dobara soch kar karte

tumhaare pas bhi hoti yaqinan ilm ki daulat

jo tum raddi kitabon se kinara soch kar karte

masaib lakh mujh ko DhunDhte lekin kahan pate

meri qismat ke tare gar ishaara soch kar karte

agar pahle pata hota yahan har chiz fani hai

teri duniya mein hum jina gawara soch kar karte