mohabbat ka sajda ada ho na jae

mohabbat kā sajda adā ho na jaa.e

kahīñ tū kisī kā ḳhudā ho na jaa.e

ḳhalish ġham kī dil se judā ho na jaa.e

kahīñ zindagī be-mazā ho na jaa.e

mohabbat mirī be-ḳhudā ho na jaa.e

kahīñ phir vo zālim ḳhafā ho na jaa.e

kare bhī to kyā aah majbūr-e-ulfat

agar rāh-e-ġham meñ fanā ho na jaa.e

ḳhudā ke liye iltijā yuuñ na Thukrā

kahīñ koī be-āsrā ho na jaa.e

na itne bhī sadme do pāmāl-e-ġham ko

kahīñ sāz-e-dil be-sadā ho na jaa.e

na karnā kabhī arz-e-ġham un se 'sāhir'

kahīñ iltijā bhī gila ho na jaa.e

mohabbat ka sajda ada ho na jae

kahin tu kisi ka KHuda ho na jae

KHalish gham ki dil se juda ho na jae

kahin zindagi be-maza ho na jae

mohabbat meri be-KHuda ho na jae

kahin phir wo zalim KHafa ho na jae

kare bhi to kya aah majbur-e-ulfat

agar rah-e-gham mein fana ho na jae

KHuda ke liye iltija yun na Thukra

kahin koi be-asra ho na jae

na itne bhi sadme do pamal-e-gham ko

kahin saz-e-dil be-sada ho na jae

na karna kabhi arz-e-gham un se 'sahir'

kahin iltija bhi gila ho na jae