mohabbat ka teri banda har ek ko ai sanam paya

mohabbat kā tirī banda har ik ko ai sanam paayā

barābar gardan-e-shāh-o-gadā donoñ ko ḳham paayā

ba-rañg-e-sham.a jis nai dil jalāyā terī duurī maiñ

to us nai manzil-e-maqsūd ko zer-e-qadam paayā

bajā karte haiñ āshiq tāq-e-abrū kī parastārī

yahī mehrāb-e-dair-o-ka.aba meñ bhī ham ne ḳham paayā

nishāna tīr-e-tohmat kā hai merā aḳhtar-e-tāle

uThā.ūñ daaġh maiñ to āsmāñ samjhe diram paayā

hazāroñ hasrateñ jāveñgī mere saath duniyā se

sharār-o-barq se bhī arsa-e-hastī ko kam paayā

sivā.e rañj kuchh hāsil nahīñ hai is ḳharābe maiñ

ġhanīmat jaan jo ārām tū ne koī dam paayā

nazar aayā tamāshā-e-jahāñ jab band kiiñ āñkheñ

safā-e-qalb se pahlū meñ ham ne jām-e-jam paayā

jalāyā aur maarā husn kī nairañg-sāzī ne

kabhī barq-e-ġhazab us ko kabhī abr-e-karam paayā

firāq-anjām kaam āġhāz-e-vaslat kā bilā shak hai

bahut royā maiñ rūh-o-tan ko jab mushtāq ham paayā

har ik jauhar meñ us kā naqsh-e-pā-e-raftagāñ samjhā

dam-e-shamshīr-e-qātil jāda-e-rāh-e-adam paayā

hamārā kāba-e-maqsūd terā tāq-e-abrū hai

tirī chashm-e-siyah ko ham ne āhu-e-haram paayā

huā hargiz na ḳhatt-e-shauq kā sāmāñ durust 'ātish'

siyāhī ho ga.ī nāyāb agar ham ne qalam paayā

mohabbat ka teri banda har ek ko ai sanam paya

barabar gardan-e-shah-o-gada donon ko KHam paya

ba-rang-e-shama jis nai dil jalaya teri duri main

to us nai manzil-e-maqsud ko zer-e-qadam paya

baja karte hain aashiq taq-e-abru ki parastari

yahi mehrab-e-dair-o-kaba mein bhi hum ne KHam paya

nishana tir-e-tohmat ka hai mera aKHtar-e-tale

uThaun dagh main to aasman samjhe diram paya

hazaron hasraten jawengi mere sath duniya se

sharar-o-barq se bhi arsa-e-hasti ko kam paya

siwae ranj kuchh hasil nahin hai is KHarabe main

ghanimat jaan jo aaram tu ne koi dam paya

nazar aaya tamasha-e-jahan jab band kin aankhen

safa-e-qalb se pahlu mein hum ne jam-e-jam paya

jalaya aur mara husn ki nairang-sazi ne

kabhi barq-e-ghazab us ko kabhi abr-e-karam paya

firaq-anjam kaam aaghaz-e-waslat ka bila shak hai

bahut roya main ruh-o-tan ko jab mushtaq hum paya

har ek jauhar mein us ka naqsh-e-pa-e-raftagan samjha

dam-e-shamshir-e-qatil jada-e-rah-e-adam paya

hamara kaba-e-maqsud tera taq-e-abru hai

teri chashm-e-siyah ko hum ne aahu-e-haram paya

hua hargiz na KHatt-e-shauq ka saman durust 'atish'

siyahi ho gai nayab agar hum ne qalam paya