mohabbat ke nashe mein chhan-chhanan karte hue kangan

mohabbat ke nashe meñ chhan-chhanan karte hue kangan

tire hāthoñ meñ aa kar aur bhī mahñge hue kangan

baḌī mushkil se us ke baap ne kangan ḳharīde the

suhāgan tak rahī hai duur se beche hue kangan

binā marzī ke ye zevar faqat bandhan barābar haiñ

nahīñ jachte kisī ke haath meñ bāñdhe hue kangan

bhale kuchh kar nahīñ saktā magar ye dukh to hai mujh ko

parā.e haath meñ jākar bahut maile hue kangan

vo achchhe se samajhtī thī mire ghar-bār kī hālat

so us ke hoñT kan pe ruk ga.e kahte hue kangan

kisī ne taish meñ aakar tire hāthoñ ko jhaTkā thā

mire paañv meñ chubhte haiñ tere TuuTe hue kangan

mohabbat ke nashe mein chhan-chhanan karte hue kangan

tere hathon mein aa kar aur bhi mahnge hue kangan

baDi mushkil se us ke bap ne kangan KHaride the

suhagan tak rahi hai dur se beche hue kangan

bina marzi ke ye zewar faqat bandhan barabar hain

nahin jachte kisi ke hath mein bandhe hue kangan

bhale kuchh kar nahin sakta magar ye dukh to hai mujh ko

parae hath mein jakar bahut maile hue kangan

wo achchhe se samajhti thi mere ghar-bar ki haalat

so us ke honT kan pe ruk gae kahte hue kangan

kisi ne taish mein aakar tere hathon ko jhaTka tha

mere panw mein chubhte hain tere TuTe hue kangan