mohabbat mein ek aisa bhi maqam aata hai mushkil ka

mohabbat meñ ik aisā bhī maqām aatā hai mushkil kā

jahāñ ḳhud dil hī ban jaatā hai dushman hastī-e-dil kā

nazar kaisī ḳhayāloñ se hai ūñchā silsila dil kā

pata ḳhud pūchhtā hai ishq mujh se merī manzil kā

har ik karvaT pe dard-e-ishq kī taḌpā nahīñ jaatā

kahāñ tak saath degī zindagī be-tābī-e-dil kā

mirī āñkhoñ meñ maujeñ haiñ mirī nazroñ meñ tūfāñ hai

safīna merā parvarda nahīñ āġhosh-e-sāhil kā

mirī zauq-e-ḳhalish ik mustaqil duniyā-e-rāhat hai

ki har ik ḳhaar pe hotā hai dhokā mujh ko manzil kā

maze tanhā.iyoñ ke bhī kabhī aate haiñ mahfil meñ

kabhī tanhā.iyāñ bhī lutf de jaatī haiñ mahfil kā

pilā sāġhar nigāh-e-mast se bhī kaam le saaqī

mujhe ehsās kuchh hone lagā hai haqq-o-bātil kā

agar samjho to har qatra mohabbat kī kahānī hai

nahīñ ye ashk ik paiġhām hai TuuTe hue dil kā

sadā-e-shauq-e-nazzāra na sāz-e-be-niyāzī hai

bas ik naġhma fazā meñ gūñjtā hai parda-e-dil kā

tire dar par mujhe ye fitrat-e-majbūr laa.ī hai

na jaane aaj kis duniyā meñ aalam hai mire dil kā

ġham-e-pinhāñ ke parde meñ nashāt-e-kāmrānī hai

zamāne se alag haT kar zamāna hai mire dil kā

junūñ kī azmateñ mujh ko 'munīr' āġhosh meñ leñgī

tavāf apnī nigāheñ kar rahī haiñ us kī mahfil kā

mohabbat mein ek aisa bhi maqam aata hai mushkil ka

jahan KHud dil hi ban jata hai dushman hasti-e-dil ka

nazar kaisi KHayalon se hai uncha silsila dil ka

pata KHud puchhta hai ishq mujh se meri manzil ka

har ek karwaT pe dard-e-ishq ki taDpa nahin jata

kahan tak sath degi zindagi be-tabi-e-dil ka

meri aankhon mein maujen hain meri nazron mein tufan hai

safina mera parwarda nahin aaghosh-e-sahil ka

meri zauq-e-KHalish ek mustaqil duniya-e-rahat hai

ki har ek KHar pe hota hai dhoka mujh ko manzil ka

maze tanhaiyon ke bhi kabhi aate hain mahfil mein

kabhi tanhaiyan bhi lutf de jati hain mahfil ka

pila saghar nigah-e-mast se bhi kaam le saqi

mujhe ehsas kuchh hone laga hai haqq-o-baatil ka

agar samjho to har qatra mohabbat ki kahani hai

nahin ye ashk ek paigham hai TuTe hue dil ka

sada-e-shauq-e-nazzara na saz-e-be-niyazi hai

bas ek naghma faza mein gunjta hai parda-e-dil ka

tere dar par mujhe ye fitrat-e-majbur lai hai

na jaane aaj kis duniya mein aalam hai mere dil ka

gham-e-pinhan ke parde mein nashat-e-kaamrani hai

zamane se alag haT kar zamana hai mere dil ka

junun ki azmaten mujh ko 'munir' aaghosh mein lengi

tawaf apni nigahen kar rahi hain us ki mahfil ka