mohabbat mein sahar ai dil barae nam aati hai

mohabbat meñ sahar ai dil barā.e naam aatī hai

ye vo manzil hai jis manzil meñ aksar shaam aatī hai

safīna jis jagah Duubā thā merā bahr-e-ulfat meñ

vahāñ har mauj ab tak larza-bar-andām aatī hai

na jaane kyuuñ dil-e-ġham āshnā ko dekh letā huuñ

jahāñ kānoñ meñ āvāz-e-shikast-e-jām aatī hai

dil-e-nādāñ yahī rañgīñ adā.eñ luuT letī haiñ

shafaq kī surḳhiyoñ hī meñ to chhup kar shaam aatī hai

mohabbat ne har ik se be-ta.alluq kar diyā mujh ko

tumhārī yaad bhī ab to barā.e naam aatī hai

na jaane kaun sī mahfil meñ ab tum jalva-farmā ho

nazar rah rah ke uThtī hai magar nākām aatī hai

ġham-e-daurāñ se mil jaatī hai thoḌī der ko fursat

tasavvur meñ jahāñ ik jannat-e-benām aatī hai

badal saktā huuñ us kā ruḳh magar ye soch kar chup huuñ

tumhārā naam le kar gardish-e-ayyām aatī hai

laraz uThte haiñ kaunain ai 'mushīr' anjām-e-ulfat par

jabīn-e-shauq us ke dar se jab nākām aatī hai

mohabbat mein sahar ai dil barae nam aati hai

ye wo manzil hai jis manzil mein aksar sham aati hai

safina jis jagah Duba tha mera bahr-e-ulfat mein

wahan har mauj ab tak larza-bar-andam aati hai

na jaane kyun dil-e-gham aashna ko dekh leta hun

jahan kanon mein aawaz-e-shikast-e-jam aati hai

dil-e-nadan yahi rangin adaen luT leti hain

shafaq ki surKHiyon hi mein to chhup kar sham aati hai

mohabbat ne har ek se be-talluq kar diya mujh ko

tumhaari yaad bhi ab to barae nam aati hai

na jaane kaun si mahfil mein ab tum jalwa-farma ho

nazar rah rah ke uThti hai magar nakaam aati hai

gham-e-dauran se mil jati hai thoDi der ko fursat

tasawwur mein jahan ek jannat-e-benam aati hai

badal sakta hun us ka ruKH magar ye soch kar chup hun

tumhaara nam le kar gardish-e-ayyam aati hai

laraz uThte hain kaunain ai 'mushir' anjam-e-ulfat par

jabin-e-shauq us ke dar se jab nakaam aati hai