mohabbat mein teri jab mujhko aalam ne malamat ki

mohabbat meñ tirī jab mujh ko 'ālam ne malāmat kī

dil-o-jāñ ne tab aapas meñ mubārak aur salāmat kī

qayāmat jis ko kahte haiñ ye ik muddat kā thā misra'

ye mere misra.a-e-mauzūñ ne us qad kī qayāmat kī

kiyā qumrī ne naala aur khīñchī aah bulbul ne

chalī kuchh baat jab gulshan meñ mere sarv-qāmat kī

jab apnā kaam tere 'ishq meñ tadbīr se guzrā

chalī āñkhoñ se merī sail tab ashk-e-nadāmat kī

suḳhan kā ye buzurgoñ kī tatabbo bas-ki kartā hai

nikaltī hai 'hasan' kī baat meñ ik bū qadāmat kī

mohabbat mein teri jab mujh ko 'alam ne malamat ki

dil-o-jaan ne tab aapas mein mubarak aur salamat ki

qayamat jis ko kahte hain ye ek muddat ka tha misra'

ye mere misra-e-mauzun ne us qad ki qayamat ki

kiya qumri ne nala aur khinchi aah bulbul ne

chali kuchh baat jab gulshan mein mere sarw-qamat ki

jab apna kaam tere 'ishq mein tadbir se guzra

chali aankhon se meri sail tab ashk-e-nadamat ki

suKHan ka ye buzurgon ki tatabbo bas-ki karta hai

nikalti hai 'hasan' ki baat mein ek bu qadamat ki