mohabbat mein to jaan-o-dil ka nazrana bhi hota hai

mohabbat meñ to jān-o-dil kā nazrāna bhī hotā hai

kaf-e-afsos ko mal mal ke pachhtānā bhī hotā hai

tujhe pā kar ye jaanā ishq meñ saarī ḳhushī paalī

tujhe kho kar ye samjhā is meñ ġham khānā bhī hotā hai

na phūloñ meñ hai ra.anā.ī na tāroñ meñ hai zebā.ī

baḌā be-kaif shām-e-ġham kā afsāna bhī hotā hai

mohabbat meñ jab iz.hār-e-mohabbat pe ho pābandī

to dil kī baat ko āñkhoñ se samjhānā bhī hotā hai

ye terī be-ruḳhī terā taġhāful bekalī terī

inhīñ ashkāl meñ is dil ko bahlānā bhī hotā hai

shabāb-e-husn pe zebā nahīñ hai naaz ai 'ḳhālid'

kalī jab phuul bantī hai to murjhānā bhī hotā hai

mohabbat mein to jaan-o-dil ka nazrana bhi hota hai

kaf-e-afsos ko mal mal ke pachhtana bhi hota hai

tujhe pa kar ye jaana ishq mein sari KHushi pali

tujhe kho kar ye samjha is mein gham khana bhi hota hai

na phulon mein hai ranai na taron mein hai zebai

baDa be-kaif sham-e-gham ka afsana bhi hota hai

mohabbat mein jab izhaar-e-mohabbat pe ho pabandi

to dil ki baat ko aankhon se samjhana bhi hota hai

ye teri be-ruKHi tera taghaful bekali teri

inhin ashkal mein is dil ko bahlana bhi hota hai

shabab-e-husn pe zeba nahin hai naz ai 'KHalid'

kali jab phul banti hai to murjhana bhi hota hai