mohabbat naghma bhi hai saz bhi hai

mohabbat naġhma bhī hai saaz bhī hai

shikast-e-sāz kī āvāz bhī hai

hai niyyat hī meñ dozaḳh aur jannat

yahī dam-soz bhī dam-sāz bhī hai

na toḌeñ merā sāz-e-dil na toḌeñ

ki is meñ aap kī āvāz bhī hai

mohabbat yuuñ to hai ik lafz-e-sāda

jo samjho to fasāna-sāz bhī hai

qafas parvāz-e-dushman to hai lekin

qafas ik dāvat-e-parvāz bhī hai

yahī gul hai jo tasvīr-e-ḳhamoshī

shikast-e-ġhuncha kī āvāz bhī hai

nahīñ zanjīr-e-pā hī ye tasavvur

jo bañdh jaa.e par-e-parvāz bhī hai

maiñ terā raaz kholūñ bhī to kyuuñ kar

ki terā raaz merā raaz bhī hai

ye duniyā hai jo ḳhvāb-e-nāz 'ra.anā'

yahī ta.abīr-e-ḳhvāb-e-nāz bhī hai

mohabbat naghma bhi hai saz bhi hai

shikast-e-saz ki aawaz bhi hai

hai niyyat hi mein dozaKH aur jannat

yahi dam-soz bhi dam-saz bhi hai

na toDen mera saz-e-dil na toDen

ki is mein aap ki aawaz bhi hai

mohabbat yun to hai ek lafz-e-sada

jo samjho to fasana-saz bhi hai

qafas parwaz-e-dushman to hai lekin

qafas ek dawat-e-parwaz bhi hai

yahi gul hai jo taswir-e-KHamoshi

shikast-e-ghuncha ki aawaz bhi hai

nahin zanjir-e-pa hi ye tasawwur

jo bandh jae par-e-parwaz bhi hai

main tera raaz kholun bhi to kyun kar

ki tera raaz mera raaz bhi hai

ye duniya hai jo KHwab-e-naz 'rana'

yahi tabir-e-KHwab-e-naz bhi hai