mohabbat se teri yaaden jaga kar so raha hun

mohabbat se tirī yādeñ jagā kar so rahā huuñ

maiñ aadhī raat ko ḳhushbū lagā kar so rahā huuñ

sunā hai jab se tū ne raat āñkhoñ meñ basar kī

maiñ bistar kī jagah kāñTe bichhā kar so rahā huuñ

maiñ dariyā huuñ mirī gahrā.ī poshīda hai mujh meñ

giraft-e-ḳhāk se dāman chhuḌā kar so rahā huuñ

vo ghar meñ hai magar kahtā hai koī ghar nahīñ hai

to maiñ bhī aaj vīrāne meñ jā kar so rahā huuñ

nahīñ hai dastaras meñ ab zamīñ kā koī TukḌā

so maiñ kāġhaz pe apnā ghar banā kar so rahā huuñ

vo ḳhvāhish jis ko siine se abhī lipTā rahā thā

isī ko apne pahlū se haTā kar so rahā huuñ

mohabbat se teri yaaden jaga kar so raha hun

main aadhi raat ko KHushbu laga kar so raha hun

suna hai jab se tu ne raat aankhon mein basar ki

main bistar ki jagah kanTe bichha kar so raha hun

main dariya hun meri gahrai poshida hai mujh mein

giraft-e-KHak se daman chhuDa kar so raha hun

wo ghar mein hai magar kahta hai koi ghar nahin hai

to main bhi aaj virane mein ja kar so raha hun

nahin hai dastaras mein ab zamin ka koi TukDa

so main kaghaz pe apna ghar bana kar so raha hun

wo KHwahish jis ko sine se abhi lipTa raha tha

isi ko apne pahlu se haTa kar so raha hun