mohabbat se waqar-e-zindagi hai

mohabbat se vaqār-e-zindagī hai

yahī to e'tibār-e-zindagī hai

vahī hotā hai jo vo chāhte haiñ

unhī par inhisār-e-zindagī hai

mohabbat se koī jab muskurā de

to har lamha bahār-e-zindagī hai

kisī kī yād-e-tanhā.ī kā aalam

judā sab se shi.ār-e-zindagī hai

hañsī ke saath bhiig uThtī haiñ palkeñ

ġham-e-be-iḳhtiyār-e-zindagī hai

tumhāre qurb kī me.arāj pā kar

ye dil mast-e-ḳhumār-e-zindagī hai

kisī se kyā kaheñ kyā hai mohabbat

yahī to rāz-dār-e-zindagī hai

kabhī rāhat kabhī ġham harz-e-jāñ hai

'vafā' ye kār-zār-e-zindagi hai

mohabbat se waqar-e-zindagi hai

yahi to e'tibar-e-zindagi hai

wahi hota hai jo wo chahte hain

unhi par inhisar-e-zindagi hai

mohabbat se koi jab muskura de

to har lamha bahaar-e-zindagi hai

kisi ki yaad-e-tanhai ka aalam

juda sab se shiar-e-zindagi hai

hansi ke sath bhig uThti hain palken

gham-e-be-iKHtiyar-e-zindagi hai

tumhaare qurb ki mearaj pa kar

ye dil mast-e-KHumar-e-zindagi hai

kisi se kya kahen kya hai mohabbat

yahi to raaz-dar-e-zindagi hai

kabhi rahat kabhi gham harz-e-jaan hai

'wafa' ye kar-zar-e-zindagi hai