mohabbat sulh bhi paikar bhi hai

mohabbat sulh bhī paikār bhī hai

ye shāḳh-e-gul bhī hai talvār bhī hai

tabī.at is taraf ḳhuddār bhī hai

udhar nāzuk mizāj-e-yār bhī hai

adā-e-ishq adā-e-yār bhī hai

bahut saada bahut purkār bhī hai

ye fitne jin se ik duniyā hai nālāñ

inhīñ se garmi-e-bāzār bhī hai

junūñ ke dam se hai nazm-e-do-ālam

junūñ barham-zan-e-afkār bhī hai

nafas par hai madār-e-zindagānī

nafas chaltī huī talvār bhī hai

isī insān meñ sab kuchh hai pinhāñ

magar ye ma.arifat dushvār bhī hai

vo bū-e-gul ki hai jān-e-chaman bhī

qayāmat hai chaman-be-zār bhī hai

yahī duniyā hai nisbat āñsuoñ kī

yahī duniyā tabassum-zār bhī hai

jahāñ vo haiñ vahīñ merā tasavvur

jahāñ maiñ huuñ ḳhayāl-e-yār bhī hai

ḳhabar-dār ai subuk-sārān-e-sāhil

ye sāhil hī kabhī mañjdhār bhī hai

ġhanīmat hai ki is daur-e-havas meñ

tirā milnā bahut dushvār bhī hai

jo koī sun sake to nik.hat-e-gul

shikast-e-rañg kī jhankār bhī hai

un āñkhoñ kī zahe mojaz-bayānī

baham inkār bhī iqrār bhī hai

mohabbat sulh bhi paikar bhi hai

ye shaKH-e-gul bhi hai talwar bhi hai

tabiat is taraf KHuddar bhi hai

udhar nazuk mizaj-e-yar bhi hai

ada-e-ishq ada-e-yar bhi hai

bahut sada bahut purkar bhi hai

ye fitne jin se ek duniya hai nalan

inhin se garmi-e-bazar bhi hai

junun ke dam se hai nazm-e-do-alam

junun barham-zan-e-afkar bhi hai

nafas par hai madar-e-zindagani

nafas chalti hui talwar bhi hai

isi insan mein sab kuchh hai pinhan

magar ye marifat dushwar bhi hai

wo bu-e-gul ki hai jaan-e-chaman bhi

qayamat hai chaman-be-zar bhi hai

yahi duniya hai nisbat aansuon ki

yahi duniya tabassum-zar bhi hai

jahan wo hain wahin mera tasawwur

jahan main hun KHayal-e-yar bhi hai

KHabar-dar ai subuk-saran-e-sahil

ye sahil hi kabhi manjdhaar bhi hai

ghanimat hai ki is daur-e-hawas mein

tera milna bahut dushwar bhi hai

jo koi sun sake to nikhat-e-gul

shikast-e-rang ki jhankar bhi hai

un aankhon ki zahe mojaz-bayani

baham inkar bhi iqrar bhi hai