mohabbaton ka sila nahin hai

mohabbatoñ kā sila nahīñ hai

laboñ pe harf-e-duā nahīñ hai

nahīñ vo tasvīr paas mere

so haath merā jalā nahīñ hai

maiñ apnī lau meñ hī jal rahī huuñ

jo bujh gayā vo diyā nahīñ hai

bas ik piyālī hai mez par aur

vo muntazir ab mirā nahīñ hai

likhā janam-din pe us ko maiñ ne

vo ḳhat bhī us ko milā nahīñ hai

maiñ kis liye paar jā.ūñ 'shāhīn'

vahāñ mirā nā-ḳhudā nahīñ hai

mohabbaton ka sila nahin hai

labon pe harf-e-dua nahin hai

nahin wo taswir pas mere

so hath mera jala nahin hai

main apni lau mein hi jal rahi hun

jo bujh gaya wo diya nahin hai

bas ek piyali hai mez par aur

wo muntazir ab mera nahin hai

likha janam-din pe us ko main ne

wo KHat bhi us ko mila nahin hai

main kis liye par jaun 'shahin'

wahan mera na-KHuda nahin hai