mohabbaton mein kabhi ye asar nazar aae

mohabbatoñ meñ kabhī ye asar nazar aa.e

vo ek baar dikhe umr bhar nazar aa.e

jo sar jhukā.ūñ to pairoñ meñ beḌiyāñ dekhūñ

jo sar uThā.ūñ to neze pe sar nazar aa.e

sukūn DhūñDte thak jā.ūñ aur āḳhir-kār

vo tañg galiyoñ meñ miTTī kā ghar nazar aa.e

na manziloñ kā patā hai na rāstoñ kī ḳhabar

bhaTaktī āñkhoñ ko ab rāhbar nazar aa.e

yahī to nauha hai furqat-zada in āñkhoñ kā

payām-e-yār mile nāma-bar nazar aa.e

tabhī to mānūñ ki haañ us ko bhī mohabbat hai

jab us kī āñkhoñ meñ furqat kā Dar nazar aa.e

mujh aisā bazm meñ koī to sar-ba-zānū ho

in hañste chehroñ meñ ik chashm-e-tar nazar aa.e

mohabbaton mein kabhi ye asar nazar aae

wo ek bar dikhe umr bhar nazar aae

jo sar jhukaun to pairon mein beDiyan dekhun

jo sar uThaun to neze pe sar nazar aae

sukun DhunDte thak jaun aur aaKHir-kar

wo tang galiyon mein miTTi ka ghar nazar aae

na manzilon ka pata hai na raston ki KHabar

bhaTakti aankhon ko ab rahbar nazar aae

yahi to nauha hai furqat-zada in aankhon ka

payam-e-yar mile nama-bar nazar aae

tabhi to manun ki han us ko bhi mohabbat hai

jab us ki aankhon mein furqat ka Dar nazar aae

mujh aisa bazm mein koi to sar-ba-zanu ho

in hanste chehron mein ek chashm-e-tar nazar aae