mohabbaton par dil-e-hazin ko nisar karna

mohabbatoñ par dil-e-hazīñ ko nisār karnā

hai yuuñ ki jaise junūñ meñ ḳhud hī pe vaar karnā

ajab nahīñ vo bhī mere raste pe ḳhud ko Daale

vo jis ne sīkhā hai qāfiloñ ko ġhubār karnā

vo ek bārish kī muntazir be-shumār āñkheñ

vo ek tūfāñ kā bastiyoñ ko shumār karnā

mujhe to us ne tamām lamhe vahī diye haiñ

vahī jo ahl-e-junūñ ko hoñ iḳhtiyār karnā

shafaq utar kar tumhāre pallū se bañdh ga.ī hai

jo ho sake to sahar talak ye hisār karnā

aziyyatoñ kā ḳhamīr zaḳhm-e-nihāñ se uTThā

kabhī jo chāhā hai dil kā sahrā bahār karnā

mohabbaton par dil-e-hazin ko nisar karna

hai yun ki jaise junun mein KHud hi pe war karna

ajab nahin wo bhi mere raste pe KHud ko Dale

wo jis ne sikha hai qafilon ko ghubar karna

wo ek barish ki muntazir be-shumar aankhen

wo ek tufan ka bastiyon ko shumar karna

mujhe to us ne tamam lamhe wahi diye hain

wahi jo ahl-e-junun ko hon iKHtiyar karna

shafaq utar kar tumhaare pallu se bandh gai hai

jo ho sake to sahar talak ye hisar karna

aziyyaton ka KHamir zaKHm-e-nihan se uTTha

kabhi jo chaha hai dil ka sahra bahaar karna