mohlat mile jo marhala-e-rah-guzar ke baad

mohlat mile jo marhala-e-rah-guzar ke baa'd

leñge safar kā jā.eza ḳhatm-e-safar ke baa'd

phir bhī talab ḳharāj kī vīrāñ dayār se

pahlū meñ kyā rahā tirī pahlī nazar ke baa'd

har-chand mil ga.ī hai qafas se hameñ najāt

jaa.eñ kahāñ shikastagī-e-bāl-o-par ke baa'd

patthar baras rahe haiñ to khul kar baras paḌeñ

mumkin hai aur sar na mile mere sar ke baa'd

baaqī rahī na dil pe girāñ-bārī-e-ḳhalish

ik bojh Tal gayā gila-e-muḳhtasar ke baa'd

sab kuchh to mil gayā hai jabīn-e-niyāz ko

ab aur kyā milegā tire sang-e-dar ke baa'd

jhankār beḌiyoñ kī na vo shorish-e-junūñ

galiyāñ udaas haiñ tire shorīda-sar ke baa'd

ai 'aql-e-nā-rasā tujhe shāyad ḳhabar nahīñ

kuchh aur bhī hai sarhad-e-fikr-o-nazar ke baa'd

ai gardish-e-zamāna ye baḳhshish bhī kam nahīñ

pūchhe ga.e jo ahl-e-hunar be-hunar ke baa'd

hai tīrgī-e-shab abhī mehmāñ to kyā huā

aa.egī raushnī bhī varūd-e-sahar ke baa'd

ġham ke sivā kisī ne rifāqat na kī mirī

samjhī ye baat maiñ ne magar 'umr bhar ke baa'd

qismat meñ be-zarī hai to 'bahzād' ġham nahīñ

ab aur kyā havas ho matā'-e-hunar ke baa'd

mohlat mile jo marhala-e-rah-guzar ke ba'd

lenge safar ka jaeza KHatm-e-safar ke ba'd

phir bhi talab KHaraj ki viran dayar se

pahlu mein kya raha teri pahli nazar ke ba'd

har-chand mil gai hai qafas se hamein najat

jaen kahan shikastagi-e-baal-o-par ke ba'd

patthar baras rahe hain to khul kar baras paDen

mumkin hai aur sar na mile mere sar ke ba'd

baqi rahi na dil pe giran-bari-e-KHalish

ek bojh Tal gaya gila-e-muKHtasar ke ba'd

sab kuchh to mil gaya hai jabin-e-niyaz ko

ab aur kya milega tere sang-e-dar ke ba'd

jhankar beDiyon ki na wo shorish-e-junun

galiyan udas hain tere shorida-sar ke ba'd

ai 'aql-e-na-rasa tujhe shayad KHabar nahin

kuchh aur bhi hai sarhad-e-fikr-o-nazar ke ba'd

ai gardish-e-zamana ye baKHshish bhi kam nahin

puchhe gae jo ahl-e-hunar be-hunar ke ba'd

hai tirgi-e-shab abhi mehman to kya hua

aaegi raushni bhi warud-e-sahar ke ba'd

gham ke siwa kisi ne rifaqat na ki meri

samjhi ye baat main ne magar 'umr bhar ke ba'd

qismat mein be-zari hai to 'bahzad' gham nahin

ab aur kya hawas ho mata'-e-hunar ke ba'd