mohtaram nek dil KHush KHisal aadmi

mohtaram nek dil ḳhush ḳhisāl aadmī

ab nazar aate haiñ ḳhāl-ḳhāl aadmī

hai yahī daur-e-qaht-ur-rijāl aadmī

kab dikhā.eñge apnā kamāl aadmī

jā ba jā zālimoñ kā tasallut hai kyoñ

aadmī kā hai tujh se savāl aadmī

shād-o-ābād rahne se qāsir haiñ ye

kyoñ tabāhī ke bunte haiñ jaal aadmī

khoī insāniyat se haiñ mahrūm ab

roz karte haiñ jang-o-jidāl aadmī

nafs-e-ammāra ne aisā be-his kiyā

aadmī kī na ban paa.e Dhaal aadmī

ye sifat meñ taġhayyur ke asbāb haiñ

khā rahe haiñ harām-o-halāl aadmī

dil kā ā.īnā ab in kā chehrā nahīñ

aap apne haiñ ab yarġhamāl aadmī

thā sarokār sidq-o-safā se inheñ

aaj karte haiñ bas qīl-o-qāl aadmī

ye mire ahd-e-bad-baḳht kī baat hai

aadmī kī hī khīñche hai khaal aadmī

qabr meñ bhī to ġhārat-gar-e-amn haiñ

kar ke jaa.e kahāñ intiqāl aadmī

sher bhī 'sarfarāz' us ke haiñ munfarid

shaan ye hai ki hai be-misāl aadmī

mohtaram nek dil KHush KHisal aadmi

ab nazar aate hain KHal-KHal aadmi

hai yahi daur-e-qaht-ur-rijal aadmi

kab dikhaenge apna kamal aadmi

ja ba ja zalimon ka tasallut hai kyon

aadmi ka hai tujh se sawal aadmi

shad-o-abaad rahne se qasir hain ye

kyon tabahi ke bunte hain jal aadmi

khoi insaniyat se hain mahrum ab

roz karte hain jang-o-jidal aadmi

nafs-e-ammara ne aisa be-his kiya

aadmi ki na ban pae Dhaal aadmi

ye sifat mein taghayyur ke asbab hain

kha rahe hain haram-o-halal aadmi

dil ka aaina ab in ka chehra nahin

aap apne hain ab yarghamal aadmi

tha sarokar sidq-o-safa se inhen

aaj karte hain bas qil-o-qal aadmi

ye mere ahd-e-bad-baKHt ki baat hai

aadmi ki hi khinche hai khaal aadmi

qabr mein bhi to ghaarat-gar-e-amn hain

kar ke jae kahan intiqal aadmi

sher bhi 'sarfaraaz' us ke hain munfarid

shan ye hai ki hai be-misal aadmi