mom hai aankhon ka patthar dekh to

mom hai āñkhoñ kā patthar dekh to

jaise maiñ royā huuñ ro kar dekh to

ġham kī manzil is qadar suunī nahīñ

do-ghaḌī hamrāh chal kar dekh to

raah meñ bhī tujh se tanhā log haiñ

ghar meñ hai ghar se nikal kar dekh to

lū rukī to khiḌkiyāñ khulne lagīñ

har darīche meñ hai ḳhanjar dekh to

tere jalvoñ se makāñ bhar jā.egā

aks hai ā.īna ban kar dekh to

maiñ bhī shāyad jī sakūñ tere baġhair

ek din mujh se bichhaḌ kar dekh to

ḳhāmushī kā daur ruḳhsat ho chukā

maan hī jā.egā kah kar dekh to

tū ne jis jalve ko parda kar diyā

ghūmtā-phirtā hai ghar ghar dekh to

terī āñkheñ bhī bhar aa.eñ ġhāliban

tū bhī merā naam le kar dekh to

gore gāloñ meñ gaḌhe paḌ jā.eñge

ashk' un ko gudgudā kar dekh to

mom hai aankhon ka patthar dekh to

jaise main roya hun ro kar dekh to

gham ki manzil is qadar suni nahin

do-ghaDi hamrah chal kar dekh to

rah mein bhi tujh se tanha log hain

ghar mein hai ghar se nikal kar dekh to

lu ruki to khiDkiyan khulne lagin

har dariche mein hai KHanjar dekh to

tere jalwon se makan bhar jaega

aks hai aaina ban kar dekh to

main bhi shayad ji sakun tere baghair

ek din mujh se bichhaD kar dekh to

KHamushi ka daur ruKHsat ho chuka

man hi jaega kah kar dekh to

tu ne jis jalwe ko parda kar diya

ghumta-phirta hai ghar ghar dekh to

teri aankhen bhi bhar aaen ghaaliban

tu bhi mera nam le kar dekh to

gore galon mein gaDhe paD jaenge

ashk' un ko gudguda kar dekh to