mubham nigarshat ko fan kah diya gaya

mub.ham nigārshāt ko fan kah diyā gayā

banjar zamīñ ko shahr-e-suḳhan kah diyā gayā

hai ab bhī un ke naam se raushan bisāt-e-sher

vo jin ko e'tibār-e-suḳhan kah diyā gayā

kitne hī bāġhbānoñ ke chehre utar ga.e

bigḌā huā jo nazm-e-chaman kah diyā gayā

ḳhāshāk ko kahā gayā nasrīn-o-nastaran

kāñTe uge to sarv saman kah diyā gayā

ham ne bhī khurdure hī mazāmīñ kiye talāsh

jab khurdurā ġhazal kā badan kah diyā gayā

'rahmat' jahāñ ham aaj haiñ kal bhī vahīñ pe the

kahne ko yuuñ urūj-e-vatan kah diyā gayā

mubham nigarshat ko fan kah diya gaya

banjar zamin ko shahr-e-suKHan kah diya gaya

hai ab bhi un ke nam se raushan bisat-e-sher

wo jin ko e'tibar-e-suKHan kah diya gaya

kitne hi baghbanon ke chehre utar gae

bigDa hua jo nazm-e-chaman kah diya gaya

KHashak ko kaha gaya nasrin-o-nastaran

kanTe uge to sarw saman kah diya gaya

hum ne bhi khurdure hi mazamin kiye talash

jab khurdura ghazal ka badan kah diya gaya

'rahmat' jahan hum aaj hain kal bhi wahin pe the

kahne ko yun uruj-e-watan kah diya gaya