mubtala ek but ka hota hun

mubtalā ek but kā hotā huuñ

aaj īmān apnā khotā huuñ

teġh-e-abrū ke tiir 'ishq meñ yaar

jaan se apnī haath dhotā huuñ

jaan legī ye muft kī begār

bār-e-ranj-e-firāq Dhotā huuñ

ġhote khātā huuñ bahr-e-ulfat meñ

haal par apne aap rotā huuñ

ek jhūTe ke vasf-e-dandāñ meñ

sachche motī sadā pirotā huuñ

dil lagātā huuñ un kī mizhgāñ se

apne haq meñ ye kāñTe botā huuñ

ġham meñ ik māh-vash ke ashkoñ se

dāman-e-āsmāñ bhigotā huuñ

baḳht-e-ḳhufta kā huuñ dil-e-bedār

kaun shab ai 'vaqār' sotā huuñ

mubtala ek but ka hota hun

aaj iman apna khota hun

tegh-e-abru ke tir 'ishq mein yar

jaan se apni hath dhota hun

jaan legi ye muft ki begar

bar-e-ranj-e-firaq Dhota hun

ghote khata hun bahr-e-ulfat mein

haal par apne aap rota hun

ek jhuTe ke wasf-e-dandan mein

sachche moti sada pirota hun

dil lagata hun un ki mizhgan se

apne haq mein ye kanTe bota hun

gham mein ek mah-wash ke ashkon se

daman-e-asman bhigota hun

baKHt-e-KHufta ka hun dil-e-bedar

kaun shab ai 'waqar' sota hun