muddaa-o-arzu shauq-e-tamanna aap hain

mudda.ā-o-ārzū shauq-e-tamannā aap haiñ

kis ko kis ko maiñ batā.ūñ mere kyā kyā aap haiñ

mai-kada sāġhar surāhī aur sahbā aap haiñ

jo kisī sūrat na utre aisā nashsha aap haiñ

jis pe kartī hai mohabbat merī da.avā aap haiñ

jis kā dil shām-o-sahar paḌhtā vazīfa aap haiñ

ai mirī jān-e-ġhazal shahr-e-vafā-o-shauq meñ

merī azrā aur salmā merī nuurā aap haiñ

aap haiñ ai jān-e-jāñ mere suḳhan kī aabrū

sach to ye hai ki ġhazal kā misra.a misra.a aap haiñ

aap kī zulfoñ kā maiñ hī to nahīñ tanhā asiir

kar ga.ī barbād jo zāhid kī taqvā aap haiñ

jazba-e-pākīza mere dil kā haiñ kuchh aap hī

merī chashm-e-shauq kā saarā tamāsha aap haiñ

ahd-e-pīrī meñ ġhazal 'tarzī' miyāñ aisī javāñ

ishq meñ kis ke bhalā itne bhī rusvā aap haiñ

muddaa-o-arzu shauq-e-tamanna aap hain

kis ko kis ko main bataun mere kya kya aap hain

mai-kada saghar surahi aur sahba aap hain

jo kisi surat na utre aisa nashsha aap hain

jis pe karti hai mohabbat meri dawa aap hain

jis ka dil sham-o-sahar paDhta wazifa aap hain

ai meri jaan-e-ghazal shahr-e-wafa-o-shauq mein

meri azra aur salma meri nura aap hain

aap hain ai jaan-e-jaan mere suKHan ki aabru

sach to ye hai ki ghazal ka misra misra aap hain

aap ki zulfon ka main hi to nahin tanha asir

kar gai barbaad jo zahid ki taqwa aap hain

jazba-e-pakiza mere dil ka hain kuchh aap hi

meri chashm-e-shauq ka sara tamasha aap hain

ahd-e-piri mein ghazal 'tarzi' miyan aisi jawan

ishq mein kis ke bhala itne bhi ruswa aap hain