muddat hui hai wo mera mehman nahin hua

muddat huī hai vo mirā mehmāñ nahīñ huā

ghar meñ isī sabab se charāġhāñ nahīñ huā

shāmeñ udaas rāteñ bhī be-nūr haiñ bahut

vo muddatoñ se bazm-e-nigārāñ nahīñ huā

aa.egā vo zarūr mirī anjuman meñ phir

dil merā is liye bhī hirāsāñ nahīñ huā

merī anā ne raah meñ dīvār khīñch dī

is baar bhī safar mirā āsāñ nahīñ huā

is baar bhī bahār na.e zaḳhm de ga.ī

is baar bhī vo dard kā darmāñ nahīñ havā

maiñ ne bhī apnī palkeñ bhigoīñ nahīñ 'nigār'

vo bhī bichhaḌte vaqt pareshāñ nahīñ huā

muddat hui hai wo mera mehman nahin hua

ghar mein isi sabab se charaghan nahin hua

shamen udas raaten bhi be-nur hain bahut

wo muddaton se bazm-e-nigaran nahin hua

aaega wo zarur meri anjuman mein phir

dil mera is liye bhi hirasan nahin hua

meri ana ne rah mein diwar khinch di

is bar bhi safar mera aasan nahin hua

is bar bhi bahaar nae zaKHm de gai

is bar bhi wo dard ka darman nahin hawa

main ne bhi apni palken bhigoin nahin 'nigar'

wo bhi bichhaDte waqt pareshan nahin hua