muddat se hai milne ki tamanna mere dil mein

muddat se hai milne kī tamanna mire dil meñ

bulvā.iye yā ā.īye shāhā mire dil meñ

hai ḳhauf na duniyā kā na andesha-e-uqbā

hai tere hī rahmat kā bharosā mire dil meñ

bīmār hai bīmārī-e-isyāñ se mirā dil

aa jaao kabhī mere masīhā mire dil meñ

zulf-o-ruḳh-e-mahbūb kā rahtā hai tasavvur

ka.aba mire dil meñ hai kalīsā mire dil meñ

bas ek tamanna hai dikhā dījiye jalva

vallāh nahīñ aur tamanna mire dil meñ

lagtā nahīñ dil apnā tamāshā-e-jahāñ meñ

jab se ki khiñchā hai tirā naqsha mire dil meñ

sīmāb kī mānind taḌaptā hai dil-e-zār

hotā hai nayā roz tamāshā mire dil meñ

har daaġh mire siina kā rahtā hai daraḳhshāñ

muusā kī tarah hai yad-e-baizā mire dil meñ

hāthoñ pe ho saaqī ke 'qamar' jaan tasadduq

kuchh rang ajab kar diyā paidā mire dil meñ

muddat se hai milne ki tamanna mere dil mein

bulwaiye ya aaiye shaha mere dil mein

hai KHauf na duniya ka na andesha-e-uqba

hai tere hi rahmat ka bharosa mere dil mein

bimar hai bimari-e-isyan se mera dil

aa jao kabhi mere masiha mere dil mein

zulf-o-ruKH-e-mahbub ka rahta hai tasawwur

kaba mere dil mein hai kalisa mere dil mein

bas ek tamanna hai dikha dijiye jalwa

wallah nahin aur tamanna mere dil mein

lagta nahin dil apna tamasha-e-jahan mein

jab se ki khincha hai tera naqsha mere dil mein

simab ki manind taDapta hai dil-e-zar

hota hai naya roz tamasha mere dil mein

har dagh mere sina ka rahta hai daraKHshan

musa ki tarah hai yad-e-baiza mere dil mein

hathon pe ho saqi ke 'qamar' jaan tasadduq

kuchh rang ajab kar diya paida mere dil mein