mufassal dastanen muKHtasar kar ke dikhaenge

mufassal dāstāneñ muḳhtasar kar ke dikhā.eñge

tavālat umr bhar kī jast bhar kar ke dikhā.eñge

jo sapne dekh rakkhe haiñ jahān-e-dīda-e-vā ne

unheñ ta.abīr ke zer-e-asar kar ke dikhā.eñge

ye vo nam-nākiyāñ haiñ jo havā deñgī alaav ko

ye vo aañsū haiñ jo ḳhud ko sharar kar ke dikhā.eñge

bharosa rah gayā kuchh ḳhaak ko ham par agar to ham

fanā ke sāmne jīvan basar kar ke dikhā.eñge

talaffuz par na ho mauqūf jab kuchh to ma.ānī ko

kisī ke lafz kyā zer-o-zabar kar ke dikhā.eñge

ye bādal kyā dikhā.eñge havā ko mushta.il ho kar

ye patte peḌ ko kyā dar-ba-dar kar ke dikhā.eñge

ijāza ho gayā mojaz-bayānī kā to ham tere

isī tuḳhm-e-tahayyur ko shajar kar ke dikhā.eñge

agar pātāl ban jā.egā us kī tah meñ utreñge

agar choTī banegā us ko sar kar ke dikhā.eñge

gumāñ jo os ke qatroñ kī sūrat haiñ abhī 'ḳhāvar'

kisī din vo tumheñ ḳhud ko bhañvar kar ke dikhā.eñge

mufassal dastanen muKHtasar kar ke dikhaenge

tawalat umr bhar ki jast bhar kar ke dikhaenge

jo sapne dekh rakkhe hain jahan-e-dida-e-wa ne

unhen tabir ke zer-e-asar kar ke dikhaenge

ye wo nam-nakiyan hain jo hawa dengi alaw ko

ye wo aansu hain jo KHud ko sharar kar ke dikhaenge

bharosa rah gaya kuchh KHak ko hum par agar to hum

fana ke samne jiwan basar kar ke dikhaenge

talaffuz par na ho mauquf jab kuchh to maani ko

kisi ke lafz kya zer-o-zabar kar ke dikhaenge

ye baadal kya dikhaenge hawa ko mushtail ho kar

ye patte peD ko kya dar-ba-dar kar ke dikhaenge

ijaza ho gaya mojaz-bayani ka to hum tere

isi tuKHm-e-tahayyur ko shajar kar ke dikhaenge

agar patal ban jaega us ki tah mein utrenge

agar choTi banega us ko sar kar ke dikhaenge

guman jo os ke qatron ki surat hain abhi 'KHawar'

kisi din wo tumhein KHud ko bhanwar kar ke dikhaenge