muhit-e-pak pe mauj-e-hunar mein raushan hun

muhīt-e-pāk pe mauj-e-hunar meñ raushan huuñ

maiñ e'tibār-e-kaf-e-kūza-e-gar meñ raushan huuñ

maiñ hāshiya huuñ tire jalva-zār-e-hairat kā

maiñ tere saath tire bām-o-dar meñ raushan huuñ

maiñ āp-apnā ujālā huuñ shab ke dāman par

maiñ āp-apnī duā-e-sahar meñ raushan huuñ

bujhā sakegī na mujh ko havā-e-sūd-o-ziyāñ

maiñ tāq-e-mā-hasal-e-ḳhair-o-shar meñ raushan huuñ

uThā ke le gayā mujh ko giroh-e-na.ara-kashāñ

maiñ inqalāb kī jhūTī ḳhabar meñ raushan huuñ

vahī hai kohnagi-e-zulmat-e-ḳhalā aur maiñ

na.ī uḌaan na.e bāl-o-par meñ raushan huuñ

na jaane kab se huuñ ātish-ba-jāñ tamāshā kar

tire liye maiñ tirī rah-guzar meñ raushan huuñ

chamak rahī hai udāsī mire havāle se

maiñ 'ramz' ab bhī kisī chashm-e-tar meñ raushan huuñ

muhit-e-pak pe mauj-e-hunar mein raushan hun

main e'tibar-e-kaf-e-kuza-e-gar mein raushan hun

main hashiya hun tere jalwa-zar-e-hairat ka

main tere sath tere baam-o-dar mein raushan hun

main aap-apna ujala hun shab ke daman par

main aap-apni dua-e-sahar mein raushan hun

bujha sakegi na mujh ko hawa-e-sud-o-ziyan

main taq-e-ma-hasal-e-KHair-o-shar mein raushan hun

uTha ke le gaya mujh ko giroh-e-nara-kashan

main inqalab ki jhuTi KHabar mein raushan hun

wahi hai kohnagi-e-zulmat-e-KHala aur main

nai uDan nae baal-o-par mein raushan hun

na jaane kab se hun aatish-ba-jaan tamasha kar

tere liye main teri rah-guzar mein raushan hun

chamak rahi hai udasi mere hawale se

main 'ramz' ab bhi kisi chashm-e-tar mein raushan hun