mujh bala-nosh ko talchhaT bhi hai kafi saqi

mujh balā-nosh ko talchhaT bhī hai kaafī saaqī

bhar de chullū meñ jo ho shīshe meñ baaqī saaqī

bhar ke pilvātā nahīñ ek piyālī saaqī

saarī maiñ māñgtā huuñ detā hai aadhī saaqī

tū ne kyā ātish-e-hal-karda pilā dī saaqī

bhuun Daalā hai jigar aag lagā dī saaqī

phuul māñgūñ to pilātā hai barāñDī saaqī

kartā hai bazm-e-guzishta kī talāfī saaqī

jām-e-jam chāhiye rindoñ ko na shāhī saaqī

saltanat hai tire kūche kī gadā.ī saaqī

jaam auroñ ko diye mujh ko piyālī saaqī

ḳhud bahakne lagā mānind-e-sharābī saaqī

kyā karūñ pī ke bhalā ek piyālī saaqī

is tunuk-zarfī kā banda nahīñ aadī saaqī

kab se kahtā huuñ balā-nosh maiñ saaqī saaqī

aur pilvā de jo ho shīshe meñ baaqī saaqī

maraz-e-hijr meñ mai garche muzir hai lekin

maiñ to pī jaatā huuñ allāh hai saaqī saaqī

sub.h se shaam talak haath se chhuTtā nahīñ jaam

chāhiye apnā taḳhallus kare jaamī saaqī

maslahat hogī jo mahrūm rakhā mai se mujhe

fel hikmat se nahīñ hai tirā ḳhālī saaqī

mast kyā jāneñ kidhar dair hai ka.aba hai kahāñ

umr saarī tirī bhaTTī meñ guzārī saaqī

masjid o dair o kalīsā kī vo raunaq na rahī

tū ne buniyād jo mai-ḳhāne kī Daalī saaqī

dekhiye sohbat-e-nā-jins nibhegī kyūñ-kar

past-himmat tū tabī.at mirī aalī saaqī

fasl-e-gul aa chukī kyā duur se dahkātā hai

mai-e-gul-rañg se bhar bhar ke gulābī saaqī

vā.izo vohī karūñgā maiñ jo fatvā degā

qibla-o-kāba o murshid mirā haadī saaqī

shīsha-o-jām o subū hoñge abhī chaknāchūr

mast bahke to baḌī hogī ḳharābī saaqī

koī aafat tire mai-ḳhāne pe aa saktī hai

sab duā-go haiñ ye jitne haiñ sharābī saaqī

sirf lillāh bhī mai-ḳhāne meñ jaarī kar de

muqtazī ho jo tirī himmat-e-ālī saaqī

tañg ho kar tire har baar ke dahkāne se

kos baiThe na koī riñd-e-sharābī saaqī

jo piyegā na sharāb aaj vo mujrim hogā

kū-ba-kū kal se tū kar de ye munādī saaqī

dard bhī mujh ko pilā degā tū bad-mastī meñ

sab sunā dūñgā maiñ dīvān-e-zulālī saaqī

barf pilvā ke kaleja mirā ThanDā kar de

āb-e-añgūr ne to aag lagā dī saaqī

terā jī chāhe to pilvā de koī jām-e-sharāb

haath phailāne kā banda nahīñ aadī saaqī

nafs-e-garm kī tāsīr ne mai sāġhar se

sho.ala-e-lafz ke mānind uḌā dī saaqī

aur to hasrateñ sab 'rind' ke dil se niklīñ

jām-e-kausar kī tamannā rahī baaqī saaqī

mujh bala-nosh ko talchhaT bhi hai kafi saqi

bhar de chullu mein jo ho shishe mein baqi saqi

bhar ke pilwata nahin ek piyali saqi

sari main mangta hun deta hai aadhi saqi

tu ne kya aatish-e-hal-karda pila di saqi

bhun Dala hai jigar aag laga di saqi

phul mangun to pilata hai baranDi saqi

karta hai bazm-e-guzishta ki talafi saqi

jam-e-jam chahiye rindon ko na shahi saqi

saltanat hai tere kuche ki gadai saqi

jam auron ko diye mujh ko piyali saqi

KHud bahakne laga manind-e-sharabi saqi

kya karun pi ke bhala ek piyali saqi

is tunuk-zarfi ka banda nahin aadi saqi

kab se kahta hun bala-nosh main saqi saqi

aur pilwa de jo ho shishe mein baqi saqi

maraz-e-hijr mein mai garche muzir hai lekin

main to pi jata hun allah hai saqi saqi

subh se sham talak hath se chhuTta nahin jam

chahiye apna taKHallus kare jami saqi

maslahat hogi jo mahrum rakha mai se mujhe

fel hikmat se nahin hai tera KHali saqi

mast kya jaanen kidhar dair hai kaba hai kahan

umr sari teri bhaTTi mein guzari saqi

masjid o dair o kalisa ki wo raunaq na rahi

tu ne buniyaad jo mai-KHane ki Dali saqi

dekhiye sohbat-e-na-jins nibhegi kyun-kar

past-himmat tu tabiat meri aali saqi

fasl-e-gul aa chuki kya dur se dahkata hai

mai-e-gul-rang se bhar bhar ke gulabi saqi

waizo wohi karunga main jo fatwa dega

qibla-o-kaba o murshid mera hadi saqi

shisha-o-jam o subu honge abhi chaknachur

mast bahke to baDi hogi KHarabi saqi

koi aafat tere mai-KHane pe aa sakti hai

sab dua-go hain ye jitne hain sharabi saqi

sirf lillah bhi mai-KHane mein jari kar de

muqtazi ho jo teri himmat-e-ali saqi

tang ho kar tere har bar ke dahkane se

kos baiThe na koi rind-e-sharabi saqi

jo piyega na sharab aaj wo mujrim hoga

ku-ba-ku kal se tu kar de ye munadi saqi

dard bhi mujh ko pila dega tu bad-masti mein

sab suna dunga main diwan-e-zulali saqi

barf pilwa ke kaleja mera ThanDa kar de

aab-e-angur ne to aag laga di saqi

tera ji chahe to pilwa de koi jam-e-sharab

hath phailane ka banda nahin aadi saqi

nafs-e-garm ki tasir ne mai saghar se

shoala-e-lafz ke manind uDa di saqi

aur to hasraten sab 'rind' ke dil se niklin

jam-e-kausar ki tamanna rahi baqi saqi