mujhko jo tum se hua wo pyar bhi ujlat mein tha

mujh ko jo tum se huā vo pyaar bhī ujlat meñ thā

pyaar kyā is pyaar kā iz.hār bhī ujlat meñ thā

ik payambar ko kiyā nīlām kuchh soche baġhair

kis qadar vo misr kā bāzār bhī ujlat meñ thā

dauḌte ūñToñ se girte rāhiyoñ ko chhoḌ kar

qāfila aur qāfila sālār bhī ujlat meñ thā

hai milī mujh ko sazā-e-zīst to bas is liye

munsifī ujlat meñ pairavkār bhī ujlat meñ thā

din abhī niklā nahīñ aur be-ḳhatar vo so gayā

us galī kā sust pahre-dār bhī ujlat meñ thā

thā vo ujlat meñ jise karnā thā din bhar kaam aur

ghar meñ bistar par paḌā be-kār bhī ujlat meñ thā

phuul ko chheḌā nahīñ aur 'qais' zaḳhmī ho gayā

munsalik us shāḳh se ik ḳhaar bhī ujlat meñ thā

mujh ko jo tum se hua wo pyar bhi ujlat mein tha

pyar kya is pyar ka izhaar bhi ujlat mein tha

ek payambar ko kiya nilam kuchh soche baghair

kis qadar wo misr ka bazar bhi ujlat mein tha

dauDte unTon se girte rahiyon ko chhoD kar

qafila aur qafila salar bhi ujlat mein tha

hai mili mujh ko saza-e-zist to bas is liye

munsifi ujlat mein pairawkar bhi ujlat mein tha

din abhi nikla nahin aur be-KHatar wo so gaya

us gali ka sust pahre-dar bhi ujlat mein tha

tha wo ujlat mein jise karna tha din bhar kaam aur

ghar mein bistar par paDa be-kar bhi ujlat mein tha

phul ko chheDa nahin aur 'qais' zaKHmi ho gaya

munsalik us shaKH se ek KHar bhi ujlat mein tha