mujhko kya faeda gar koi raha mere baad

mujh ko kyā fā.eda gar koī rahā mere ba.ad

saarī maḳhlūq balā se ho fanā mere ba.ad

mar chukā maiñ to nahīñ us se mujhe kuchh hāsil

barse gar paanī kī jā āb-e-baqā mere ba.ad

chāhne vāloñ kā kartā hai zamāna mātam

mātamī rañg meñ hai zulf-e-rasā mere ba.ad

ro.eñge mujh ko mire dost sab aaTh aaTh aañsū

barsegī qabr pe ghanghor ghaTā mere ba.ad

yuuñ hī khiltī raheñgī sehn-e-chaman meñ kaliyāñ

yūñhī chaltī rahegī bād-e-sabā mere ba.ad

jaan dene ko na un par koī tayyār huā

goyā jāñ-bāz zamāne meñ na thā mere ba.ad

haath se un ke Tapakte nahīñ mai ke qatre

ashk-e-ḳhūñ rotā hai ye rañg-e-hinā mere ba.ad

hashr tak koī na rokegā sitam-gāroñ ko

jo ḳhudā pahle thā vo hī hai ḳhudā mere ba.ad

jīte-jī dete the jo gāliyāñ mujh ko 'parvīñ'

maġhfirat ke liye karte haiñ duā mere ba.ad

mujh ko kya faeda gar koi raha mere baad

sari maKHluq bala se ho fana mere baad

mar chuka main to nahin us se mujhe kuchh hasil

barse gar pani ki ja aab-e-baqa mere baad

chahne walon ka karta hai zamana matam

matami rang mein hai zulf-e-rasa mere baad

roenge mujh ko mere dost sab aaTh aaTh aansu

barsegi qabr pe ghanghor ghaTa mere baad

yun hi khilti rahengi sehn-e-chaman mein kaliyan

yunhi chalti rahegi baad-e-saba mere baad

jaan dene ko na un par koi tayyar hua

goya jaan-baz zamane mein na tha mere baad

hath se un ke Tapakte nahin mai ke qatre

ashk-e-KHun rota hai ye rang-e-hina mere baad

hashr tak koi na rokega sitam-garon ko

jo KHuda pahle tha wo hi hai KHuda mere baad

jite-ji dete the jo galiyan mujh ko 'parwin'

maghfirat ke liye karte hain dua mere baad