mujhko muaf kijiye rind-e-KHarab jaan ke

mujh ko muaaf kījiye rind-e-ḳharāb jaan ke

āñkhoñ pe hoñT rakh diye jām-e-sharāb jaan ke

hashr meñ ai ḳhudā na le mujh se hisāb-e-ḳhair-o-shar

maiñ ne to sab bhulā diyā raat kā ḳhvāb jaan ke

vaqt ne az-rah-e-karam baḳhshā thā mujh ko tāj-e-zar

maiñ ne hī ḳhud jhaTak diyā sar kā azaab jaan ke

munsif-e-vaqt āḳhirash tujh ko bhī chup sī lag ga.ī

merā savāl pūchh ke un kā javāb jaan ke

aap ko gar na yaad ho apnī jafāoñ kā shumār

dekhiye mujh ko ġhaur se fard-e-hisāb jaan ke

apnī zabāñ se kis tarah qissa-e-ġham bayāñ karūñ

paḌhiye mirī nigāh ko dil kī kitāb jaan ke

ye to na kahiye vaqt-e-dīd sab thī ḳhatā nasīm kī

aap ne rū-e-nāz pe Daalī naqāb jaan ke

mujh ko muaf kijiye rind-e-KHarab jaan ke

aankhon pe honT rakh diye jam-e-sharab jaan ke

hashr mein ai KHuda na le mujh se hisab-e-KHair-o-shar

main ne to sab bhula diya raat ka KHwab jaan ke

waqt ne az-rah-e-karam baKHsha tha mujh ko taj-e-zar

main ne hi KHud jhaTak diya sar ka azab jaan ke

munsif-e-waqt aaKHirash tujh ko bhi chup si lag gai

mera sawal puchh ke un ka jawab jaan ke

aap ko gar na yaad ho apni jafaon ka shumar

dekhiye mujh ko ghaur se fard-e-hisab jaan ke

apni zaban se kis tarah qissa-e-gham bayan karun

paDhiye meri nigah ko dil ki kitab jaan ke

ye to na kahiye waqt-e-did sab thi KHata nasim ki

aap ne ru-e-naz pe Dali naqab jaan ke