mujhko shikastagi ka qalaq der tak raha

mujh ko shikastagī kā qalaq der tak rahā

kyuuñ chehra phir janāb kā faq der tak rahā

yuuñ to ka.ī kitābeñ paḌhīñ zehn meñ magar

mahfūz ek saada varaq der tak rahā

aksar shab-e-visāl tire rūThne ke baad

ehsās par tilism-e-ramaq der tak rahā

ab hai kitāb-e-ishq meñ jo saada o salīs

pahle vo lafz lafz-e-adaq der tak rahā

sūraj ke sar ko shaam ke neze pe dekh kar

dast-e-zamīñ pe rañg-e-shafaq der tak rahā

us kā javāb ek hī lamhe meñ ḳhatm thā

phir bhī mire savāl kā haq der tak rahā

'bekal' jise bhulā ke zamāna hai mutma.in

tujh ko hī yaad vo bhī sabaq der tak rahā

mujh ko shikastagi ka qalaq der tak raha

kyun chehra phir janab ka faq der tak raha

yun to kai kitaben paDhin zehn mein magar

mahfuz ek sada waraq der tak raha

aksar shab-e-visal tere ruThne ke baad

ehsas par tilism-e-ramaq der tak raha

ab hai kitab-e-ishq mein jo sada o salis

pahle wo lafz lafz-e-adaq der tak raha

suraj ke sar ko sham ke neze pe dekh kar

dast-e-zamin pe rang-e-shafaq der tak raha

us ka jawab ek hi lamhe mein KHatm tha

phir bhi mere sawal ka haq der tak raha

'bekal' jise bhula ke zamana hai mutmain

tujh ko hi yaad wo bhi sabaq der tak raha