mujhko to gir ke marna hai

mujh ko to gir ke marnā hai

baaqī ko kyā karnā hai

shahr hai chehroñ kī tamsīl

sab kā rañg utarnā hai

vaqt hai vo nāTak jis meñ

sab ko Darā kar Darnā hai

mere naqsh-e-sānī ko

mujh meñ hī se ubharnā hai

kaisī talāfī kyā tadbīr

karnā hai aur bharnā hai

jo nahīñ guzrā hai ab tak

vo lamha to guzarnā hai

apne gumāñ kā rañg thā maiñ

ab ye rañg bikharnā hai

ham do paa.e haiñ so hameñ

mez pe jā kar charnā hai

chāhe ham kuchh bhī kar leñ

ham aisoñ ko sudharnā hai

ham tum haiñ ik lamhe ke

phir bhī va.ada karnā hai

mujh ko to gir ke marna hai

baqi ko kya karna hai

shahr hai chehron ki tamsil

sab ka rang utarna hai

waqt hai wo naTak jis mein

sab ko Dara kar Darna hai

mere naqsh-e-sani ko

mujh mein hi se ubharna hai

kaisi talafi kya tadbir

karna hai aur bharna hai

jo nahin guzra hai ab tak

wo lamha to guzarna hai

apne guman ka rang tha main

ab ye rang bikharna hai

hum do pae hain so hamein

mez pe ja kar charna hai

chahe hum kuchh bhi kar len

hum aison ko sudharna hai

hum tum hain ek lamhe ke

phir bhi wada karna hai