mujhko ye jaan-o-dil qubul naghme ko naghma hi samajh

mujh ko ye jān-o-dil qubūl naġhme ko naġhma hī samajh

saaz ye bīt.tī hai kyā ye bhī kabhī kabhī samajh

ishq hai tishnagī kā naam toḌ de gar mile bhī jaam

shiddat-e-tishnagī na dekh lazzat-e-tishnagī samajh

husn kī mehrbāniyāñ ishq ke haq meñ zahr haiñ

husn ke ijtināb tak ishq kī zindagī samajh

tark-e-ta.alluqāt bhī ain-e-ta.alluqāt hai

aag bujhī huī na jaan aag dabī huī samajh

aql ke kārobār meñ dil ko bhī rakh sharīk-e-kār

dil ke muāmalāt meñ aql ko ajnabī samajh

ġhuncha-o-gul ke saath saath dil kī taraf bhī ik nazar

shefta-e-shaguftagī vaj.h-e-shaguftagī samajh

aise bhī raaz haiñ 'ḳhumār' hote nahīñ jo āshkār

apnī hī mushkileñ na dekh un kī bhī bebasī samajh

mujh ko ye jaan-o-dil qubul naghme ko naghma hi samajh

saz ye bitti hai kya ye bhi kabhi kabhi samajh

ishq hai tishnagi ka nam toD de gar mile bhi jam

shiddat-e-tishnagi na dekh lazzat-e-tishnagi samajh

husn ki mehrbaniyan ishq ke haq mein zahr hain

husn ke ijtinab tak ishq ki zindagi samajh

tark-e-talluqat bhi ain-e-talluqat hai

aag bujhi hui na jaan aag dabi hui samajh

aql ke karobar mein dil ko bhi rakh sharik-e-kar

dil ke muamalat mein aql ko ajnabi samajh

ghuncha-o-gul ke sath sath dil ki taraf bhi ek nazar

shefta-e-shaguftagi wajh-e-shaguftagi samajh

aise bhi raaz hain 'KHumar' hote nahin jo aashkar

apni hi mushkilen na dekh un ki bhi bebasi samajh