mujh mein us mein hijab tha na raha

mujh meñ us meñ hijāb thā na rahā

pahle jo iztirāb thā na rahā

kufr hī diin ban gayā merā

kufr meñ jo hijāb thā na rahā

lazzat-e-sub.h-o-shām bhuul ga.e

dil jo bhun kar kabāb thā na rahā

be-hayā.ī kī oḌh lī chādar

pahle vo aab aab thā na rahā

is ne ab saath merā chhoḌ diyā

ishq meñ kāmyāb thā na rahā

roz-o-shab chain se guzarte haiñ

vaqt meñ pech-o-tāb thā na rahā

ho ga.e us ke dar ke pahre-dār

merā jiinā azaab thā na rahā

shaam hote hī bujh gayā 'ājiz'

ek muflis kā ḳhvāb thā na rahā

mujh mein us mein hijab tha na raha

pahle jo iztirab tha na raha

kufr hi din ban gaya mera

kufr mein jo hijab tha na raha

lazzat-e-subh-o-sham bhul gae

dil jo bhun kar kabab tha na raha

be-hayai ki oDh li chadar

pahle wo aab aab tha na raha

is ne ab sath mera chhoD diya

ishq mein kaamyab tha na raha

roz-o-shab chain se guzarte hain

waqt mein pech-o-tab tha na raha

ho gae us ke dar ke pahre-dar

mera jina azab tha na raha

sham hote hi bujh gaya 'ajiz'

ek muflis ka KHwab tha na raha