mujh par teri nazron ka jo ehsan nahin hota

mujh par tirī nazroñ kā jo ehsāñ nahīñ hotā

hāthoñ se mire chaak garebāñ nahīñ hotā

ḳhālī kabhī kāñToñ se gulistāñ nahīñ hotā

kāñToñ se kabhī phuul pareshāñ nahīñ hotā

kuchh dard ho kuchh soz ho kuchh nuur ho dil meñ

bas ḳhaak kā putlā hī to insāñ nahīñ hotā

ai dost samajhtā huuñ tirī pursish-e-ġham ko

bātoñ se kabhī dard kā darmāñ nahīñ hotā

kyuuñ us ko mire chāk-e-garebāñ kī ḳhabar ho

gesū bhī kabhī jis kā pareshāñ nahīñ hotā

ai barq-e-jahāñ-soz tujhe ye bhī ḳhabar hai

āshiq kā nasheman kabhī vīrāñ nahīñ hotā

har phuul ko dekhūñ ye hai āvārā-nigāhī

har naqsh meñ to jalva-e-jānāñ nahīñ hotā

mamnūn-e-karam ek zamāna hai hameñ kyā

ham par to kabhī aap kā ehsāñ nahīñ hotā

khultā hai koī rāz-e-nihāñ dekh chaman meñ

ġhunchoñ kā yūñhī chaak garebāñ nahīñ hotā

phūloñ se bahal jā.ūñ vo dīvāna nahīñ huuñ

kāñToñ se ulajhne ko to dāmāñ nahīñ hotā

maujoñ ko banā letā huuñ maiñ apnā safīna

tūfāñ bhī mire sāmne tūfāñ nahīñ hotā

maiñ jin pe fidā huuñ vahī jalve haiñ nazar meñ

ā.īna tujhe dekh ke hairāñ nahīñ hotā

kis manzil-e-dushvār meñ huuñ ishq kī 'ārif'

un se bhī mire dard kā darmāñ nahīñ hotā

mujh par teri nazron ka jo ehsan nahin hota

hathon se mere chaak gareban nahin hota

KHali kabhi kanTon se gulistan nahin hota

kanTon se kabhi phul pareshan nahin hota

kuchh dard ho kuchh soz ho kuchh nur ho dil mein

bas KHak ka putla hi to insan nahin hota

ai dost samajhta hun teri pursish-e-gham ko

baaton se kabhi dard ka darman nahin hota

kyun us ko mere chaak-e-gareban ki KHabar ho

gesu bhi kabhi jis ka pareshan nahin hota

ai barq-e-jahan-soz tujhe ye bhi KHabar hai

aashiq ka nasheman kabhi viran nahin hota

har phul ko dekhun ye hai aawara-nigahi

har naqsh mein to jalwa-e-jaanan nahin hota

mamnun-e-karam ek zamana hai hamein kya

hum par to kabhi aap ka ehsan nahin hota

khulta hai koi raaz-e-nihan dekh chaman mein

ghunchon ka yunhi chaak gareban nahin hota

phulon se bahal jaun wo diwana nahin hun

kanTon se ulajhne ko to daman nahin hota

maujon ko bana leta hun main apna safina

tufan bhi mere samne tufan nahin hota

main jin pe fida hun wahi jalwe hain nazar mein

aaina tujhe dekh ke hairan nahin hota

kis manzil-e-dushwar mein hun ishq ki 'arif'

un se bhi mere dard ka darman nahin hota