mujh sa na de zamane ko parwardigar dil

mujh sā na de zamāne ko parvardigār dil

āshufta dil farefta dil be-qarār dil

har baar māñgtī haiñ nayā chashm-e-yār dil

ik dil ke kis tarah se banā.ūñ hazār dil

mash.hūr ho ga.ī hai ziyārat shahīd kī

ḳhūñ-kushta aarzū kā banā hai mazār dil

ye said-gāh-e-ishq hai Thahrā.iye nigāh

sayyād-e-muztarib se na hogā shikār dil

tūfān-e-nūh bhī ho to mil jaa.e ḳhaak meñ

allāh re ġhubār tirā pur ġhubār dil

pūchhā jo us ne tālib-e-roz-e-jazā hai kaun

niklā mirī zabān se be-iḳhtiyār dil

karte ho ahd-e-vasl to itnā rahe ḳhayāl

paimān se ziyāda hai nā-pā.edār dil

tāsīr-e-ishq ye hai tire ahd-e-husn meñ

miTTī kā bhī banā.eñ to ho be-qarār dil

us kī talāsh hai ki nazar aa.e aarzū

zālim ne roz chaak kiye haiñ hazār dil

aalam huā tamām rahā us ko shauq-e-hūr

barsā.e āsmān se parvardigār dil

pahle-pahal kī chaah kā kiije na imtihāñ

aanā to siikh le abhī do-chār baar dil

nikle mirī baġhal se vo aise taḌap ke saath

yaad aa gayā mujhe vahīñ be-iḳhtiyār dil

ai andalīb tujh ko lage kab havā-e-ishq

kaliyoñ kī tarah tujh meñ na phūTe hazār dil

āshiq hue vo jaise adū par ye haal hai

rakh kah ke haath dekhte haiñ baar baar dil

us ne kahā hai sabr paḌegā raqīb kā

le aur be-qarār huā be-qarār dil

betāb ho ke bazm se us kī uThā diyā

ġhāfil maiñ huuñ magar hai bahut hoshyār dil

mash.hūr haiñ sikandar o jam kī nishāniyāñ

ai 'dāġh' chhoḌ jā.eñge ham yādgār dil

mujh sa na de zamane ko parwardigar dil

aashufta dil farefta dil be-qarar dil

har bar mangti hain naya chashm-e-yar dil

ek dil ke kis tarah se banaun hazar dil

mashhur ho gai hai ziyarat shahid ki

KHun-kushta aarzu ka bana hai mazar dil

ye said-gah-e-ishq hai Thahraiye nigah

sayyaad-e-muztarib se na hoga shikar dil

tufan-e-nuh bhi ho to mil jae KHak mein

allah re ghubar tera pur ghubar dil

puchha jo us ne talib-e-roz-e-jaza hai kaun

nikla meri zaban se be-iKHtiyar dil

karte ho ahd-e-wasl to itna rahe KHayal

paiman se ziyaada hai na-paedar dil

tasir-e-ishq ye hai tere ahd-e-husn mein

miTTi ka bhi banaen to ho be-qarar dil

us ki talash hai ki nazar aae aarzu

zalim ne roz chaak kiye hain hazar dil

aalam hua tamam raha us ko shauq-e-hur

barsae aasman se parwardigar dil

pahle-pahal ki chah ka kije na imtihan

aana to sikh le abhi do-chaar bar dil

nikle meri baghal se wo aise taDap ke sath

yaad aa gaya mujhe wahin be-iKHtiyar dil

ai andalib tujh ko lage kab hawa-e-ishq

kaliyon ki tarah tujh mein na phuTe hazar dil

aashiq hue wo jaise adu par ye haal hai

rakh kah ke hath dekhte hain bar bar dil

us ne kaha hai sabr paDega raqib ka

le aur be-qarar hua be-qarar dil

betab ho ke bazm se us ki uTha diya

ghafil main hun magar hai bahut hoshyar dil

mashhur hain sikandar o jam ki nishaniyan

ai 'dagh' chhoD jaenge hum yaadgar dil