mujhse ab tak ye gila hai mere gham-KHwaron ko

mujh se ab tak ye gila hai mire ġham-ḳhvāroñ ko

kyuuñ chhuā maiñ ne tirī yaad ke añgāroñ ko

zehn o dil hashr ke sūraj kī tarah jalte haiñ

jab se chhoḌā hai tire shahr kī dīvāroñ ko

aaj bhī aap kī yādoñ ke muqaddas jhoñke

chheḌ jaate haiñ mohabbat ke gunahgāroñ ko

aarzū soch taḌap dard kasak ġham aañsū

ham se kyā kyā na milā hijr ke bāzāroñ ko

tere jalte hue hoñToñ kī harārat na milī

merī tanhā.ī ke bhīge hue ruḳhsāroñ ko

tum ko māhaul se ho jā.egī nafrat 'āzar'

itne nazdīk se dekhā na karo yāroñ ko

mujh se ab tak ye gila hai mere gham-KHwaron ko

kyun chhua main ne teri yaad ke angaron ko

zehn o dil hashr ke suraj ki tarah jalte hain

jab se chhoDa hai tere shahr ki diwaron ko

aaj bhi aap ki yaadon ke muqaddas jhonke

chheD jate hain mohabbat ke gunahgaron ko

aarzu soch taDap dard kasak gham aansu

hum se kya kya na mila hijr ke bazaron ko

tere jalte hue honTon ki hararat na mili

meri tanhai ke bhige hue ruKHsaron ko

tum ko mahaul se ho jaegi nafrat 'azar'

itne nazdik se dekha na karo yaron ko