mujh aise wamanda-e-jaan ko bistar-wistar kya

mujh aise vāmānda-e-jāñ ko bistar-vistar kyā

pal do pal ko muuñd luuñ āñkheñ varna ghar-var kyā

chhoḌo kyā ronā le baiThe ranj-o-rāhat kā

qaid hī jab Thahrī hastī to behtar-vehtar kyā

maiñ bhī sar Takrātā phirā huuñ dīvāroñ se bahut

DhūñDh rahe ho is gumbad meñ koī dar-var kyā

āḳhir ko thak-hār ke mujh ko zamīñ par aanā hai

zor-o-shor-e-bāzū kaisā shahpar-vahpar kyā

mere qalam hī se jab merā rizq utartā hai

jaanā hai ik kār-e-ziyāñ ko daftar-vaftar kyā

sūrat ek tarāshūñgā to sau rah jā.eñgī

kyuuñ patthar ko subuk karūñ maiñ paikar-vaikar kyā

bālīda bār-āvar honā miTTī ho jaanā

sarsabzī zarḳhezī kaisī banjar-vanjar kyā

aab o sarāb o ḳhvāb o haqīqat ek se lagte haiñ

dīda-varī kyā ā.īna kā jauhar-vauhar kyā

mujh ko bahā.e le jaatī hai ḳhud hī mauj mirī

merā rasta rok sakeñge patthar-vatthar kyā

rang-e-shafaq sabze kā nasha kuchh nahīñ āñkhoñ meñ

duur ḳhalā meñ dekh rahā huuñ manzar-vanzar kyā

merā aur sāhil kā rishta kab kā TuuT chukā

'zeb' kahāñ kā ḳhema-e-kashtī lañgar-vañgar kyā

mujh aise wamanda-e-jaan ko bistar-wistar kya

pal do pal ko mund lun aankhen warna ghar-war kya

chhoDo kya rona le baiThe ranj-o-rahat ka

qaid hi jab Thahri hasti to behtar-wehtar kya

main bhi sar Takraata phira hun diwaron se bahut

DhunDh rahe ho is gumbad mein koi dar-war kya

aaKHir ko thak-haar ke mujh ko zamin par aana hai

zor-o-shor-e-bazu kaisa shahpar-wahpar kya

mere qalam hi se jab mera rizq utarta hai

jaana hai ek kar-e-ziyan ko daftar-waftar kya

surat ek tarashunga to sau rah jaengi

kyun patthar ko subuk karun main paikar-waikar kya

baalida bar-awar hona miTTi ho jaana

sarsabzi zarKHezi kaisi banjar-wanjar kya

aab o sarab o KHwab o haqiqat ek se lagte hain

dida-wari kya aaina ka jauhar-wauhar kya

mujh ko bahae le jati hai KHud hi mauj meri

mera rasta rok sakenge patthar-watthar kya

rang-e-shafaq sabze ka nasha kuchh nahin aankhon mein

dur KHala mein dekh raha hun manzar-wanzar kya

mera aur sahil ka rishta kab ka TuT chuka

'zeb' kahan ka KHema-e-kashti langar-wangar kya