mujhse bazi le gaya phir ba-KHuda mera nasib

mujh se baazī le gayā phir bā-ḳhudā merā nasīb

maiñ sisaktā rah gayā hañstā rahā merā nasīb

zindagī ke naam par jab zindagī mujh ko milī

imtihāñ-dar-imtihāñ likkhā gayā merā nasīb

maiñ to rishtoñ kī tamāzat se jhulas kar rah gayā

aur us par tiir kī sūrat lagā merā nasīb

kyā samajhtā maiñ bhalā mahdūd huuñ apne ta.iiñ

ki sazā hai yā kisī kī bad-duā merā nasīb

hasratoñ ne lā ke pheñkā jab mujhe bāzār meñ

boliyāñ lagtī rahīñ biktā rahā merā nasīb

chaak par kūza-garī ke ba.ad us ḳhattāt ne

haath kī uljhī lakīroñ par likhā merā nasīb

jab kahīñ gherā ġhamoñ kī āñdhiyoñ ne bā-ḳhudā

daldaloñ meñ le ke mujh ko gir paḌā merā nasīb

kab talak piitā rahūñ ai zindagī maiñ jām-e-ġham

kab talak mujh se rahe kā yuuñ ḳhafā merā nasīb

ik qadam maiñ ne uThāyā toḌ kar zanjīr-e-pā

bichh gayā kāñToñ kī sūrat jā-ba-jā merā nasīb

hai sabab mauj-e-'nasīmī' kī ravānī kā yahī

dastaras meñ jo nahīñ mere ḳhudā merā nasīb

mujh se bazi le gaya phir ba-KHuda mera nasib

main sisakta rah gaya hansta raha mera nasib

zindagi ke nam par jab zindagi mujh ko mili

imtihan-dar-imtihan likkha gaya mera nasib

main to rishton ki tamazat se jhulas kar rah gaya

aur us par tir ki surat laga mera nasib

kya samajhta main bhala mahdud hun apne tain

ki saza hai ya kisi ki bad-dua mera nasib

hasraton ne la ke phenka jab mujhe bazar mein

boliyan lagti rahin bikta raha mera nasib

chaak par kuza-gari ke baad us KHattat ne

hath ki uljhi lakiron par likha mera nasib

jab kahin ghera ghamon ki aandhiyon ne ba-KHuda

daldalon mein le ke mujh ko gir paDa mera nasib

kab talak pita rahun ai zindagi main jam-e-gham

kab talak mujh se rahe ka yun KHafa mera nasib

ek qadam main ne uThaya toD kar zanjir-e-pa

bichh gaya kanTon ki surat ja-ba-ja mera nasib

hai sabab mauj-e-'nasimi' ki rawani ka yahi

dastaras mein jo nahin mere KHuda mera nasib