mujhse dil aap ka mukaddar hai

mujh se dil aap kā mukaddar hai

aisā jiinā mujhe bhī dūbhar hai

kyā qalam-kāriyāñ haiñ qudrat kī

ek pattī hazār daftar hai

haath aa.e to dil meñ rakh luuñ maiñ

kaisā pyārā tumhārā ḳhanjar hai

apnī shah-rag kā ḳhuuñ pilā.ūñ ise

do mujhe ye tumhārā ḳhanjar hai

ye isī ke liye huā paidā

aap kī teġh hai mirā sar hai

bhūltī hī nahīñ hai yaad tirī

raat bhar hai ye shaġhl din bhar hai

apnī hī shakl ke vo āshiq haiñ

bas nazar un kī aa.ine par hai

dekh kar un ko jī gayā āshiq

ye hai sūrat jo rūh-parvar hai

haath ḳhālī agar haiñ kyā parvā

jaan hāzir hai dil tavangar hai

mar gayā aaj aap kā āshiq

ab na vo shor hai na vo shar hai

shā.erī kā mazā gayā 'akbar'

ab hujūm āfatoñ kā dil par hai

mujh se dil aap ka mukaddar hai

aisa jina mujhe bhi dubhar hai

kya qalam-kariyan hain qudrat ki

ek patti hazar daftar hai

hath aae to dil mein rakh lun main

kaisa pyara tumhaara KHanjar hai

apni shah-rag ka KHun pilaun ise

do mujhe ye tumhaara KHanjar hai

ye isi ke liye hua paida

aap ki tegh hai mera sar hai

bhulti hi nahin hai yaad teri

raat bhar hai ye shaghl din bhar hai

apni hi shakl ke wo aashiq hain

bas nazar un ki aaine par hai

dekh kar un ko ji gaya aashiq

ye hai surat jo ruh-parwar hai

hath KHali agar hain kya parwa

jaan hazir hai dil tawangar hai

mar gaya aaj aap ka aashiq

ab na wo shor hai na wo shar hai

shaeri ka maza gaya 'akbar'

ab hujum aafaton ka dil par hai