mujhse kyun kahte ho mazmun ghair ki tahrir ka

mujh se kyuuñ kahte ho mazmūñ ġhair kī tahrīr kā

jāntā huuñ mudda.ā maiñ aap kī taqrīr kā

saath gar sone na doge tum ko bhī niiñd aa chukī

maiñ to aadī ho gayā huuñ nāla-e-shab-gīr kā

apne matlab kī samajh kar ho ga.e the ham to ḳhush

kyuuñ mukarte ho yahī matlab hai us taqrīr kā

ahd kis kaa, aap jo kahte use sach jāntā

kyā karūñ qaa.il huuñ maiñ to ġhair kī tadbīr kā

kuchh asar un par huā to kyā hī dete haiñ fareb

kahte haiñ qaa.il nahīñ maiñ āh-e-be-tāsīr kā

ye to farmāo ki kyā us ko karūñgā maiñ muaaf

mere aage zikr kyuuñ hai ġhair kī taqsīr kā

ek din sun kar chale aa.e the vo be-sāḳhta

āsmāñ par hai dimāġh ab āh-e-be-tāsīr kā

pañja-e-ulfat se pakḌā hai use dil ne mire

sahl hai qātil koī pahlū se khiñchnā tiir kā

koshish-e-bejā thī ye kuchh e'timād-e-aql par

ab ye darja hai ki qaa.il hī nahīñ tadbīr kā

jitne sar haiñ utne saude kyā ḳhatā nāseh mirī

maiñ hī ik qaidī nahīñ us zulf-e-ālam-gīr kā

kyā kahā thā maiñ ne tum kyā samjhe is kā kyā ilaaj

tum hī munsif ho ye matlab thā mirī taqrīr kā

ye mirā likkhā ki jo tadbīr kī ulTī paḌī

aur is par bhī mujhe shikva nahīñ taqdīr kā

jazb-e-ulfat is ko kahte haiñ kahīñ paḌ jaa.e haath

zaḳhm dil par hī pahuñchtā hai tirī shamshīr kā

mujh ko us ke paas jaanā us meñ jo kuchh ho 'nizām'

ek matlab jāntā huuñ zillat o tauqīr kā

mujh se kyun kahte ho mazmun ghair ki tahrir ka

jaanta hun muddaa main aap ki taqrir ka

sath gar sone na doge tum ko bhi nind aa chuki

main to aadi ho gaya hun nala-e-shab-gir ka

apne matlab ki samajh kar ho gae the hum to KHush

kyun mukarte ho yahi matlab hai us taqrir ka

ahd kis ka, aap jo kahte use sach jaanta

kya karun qail hun main to ghair ki tadbir ka

kuchh asar un par hua to kya hi dete hain fareb

kahte hain qail nahin main aah-e-be-tasir ka

ye to farmao ki kya us ko karunga main muaf

mere aage zikr kyun hai ghair ki taqsir ka

ek din sun kar chale aae the wo be-saKHta

aasman par hai dimagh ab aah-e-be-tasir ka

panja-e-ulfat se pakDa hai use dil ne mere

sahl hai qatil koi pahlu se khinchna tir ka

koshish-e-beja thi ye kuchh e'timad-e-aql par

ab ye darja hai ki qail hi nahin tadbir ka

jitne sar hain utne saude kya KHata naseh meri

main hi ek qaidi nahin us zulf-e-alam-gir ka

kya kaha tha main ne tum kya samjhe is ka kya ilaj

tum hi munsif ho ye matlab tha meri taqrir ka

ye mera likkha ki jo tadbir ki ulTi paDi

aur is par bhi mujhe shikwa nahin taqdir ka

jazb-e-ulfat is ko kahte hain kahin paD jae hath

zaKHm dil par hi pahunchta hai teri shamshir ka

mujh ko us ke pas jaana us mein jo kuchh ho 'nizam'

ek matlab jaanta hun zillat o tauqir ka