mujhse luknat hui aur baat sanbhaali usne

mujh se luknat huī aur baat sañbhālī us ne

bas kabhī dekhī nahīñ aañkh kī laalī us ne

vo gale miltā hai malbūs bachā kar apnā

zindagī kaisī kalaf-dār banā lī us ne

ajnabī samt meñ parvāz-e-tajassus us kā

dam-ba-ḳhud ghar se alag jhok basā lī us ne

itnā mādūm huā vo ki nazar se bichhḌā

lams kī yaad bhī poroñ se uThā lī us ne

jism ke paar mirī ruuh talak sannāTā

hijr kī raakh meñ miTTī mirī Dhālī us ne

mom-battī ke muqābil meñ biThā kar us ko

khīñch lī phir koī tasvīr misālī us ne

munkashif ho gayā ik aur mohazzab lamha

ḳhud jalā kar bhī mirī raakh sañbhālī us ne

maiñ samā.at kā hunar bhuul hī jā.ūñ na 'sahar'

chhū ke dekhī hai mire kaan kī baalī us ne

mujh se luknat hui aur baat sanbhaali us ne

bas kabhi dekhi nahin aankh ki lali us ne

wo gale milta hai malbus bacha kar apna

zindagi kaisi kalaf-dar bana li us ne

ajnabi samt mein parwaz-e-tajassus us ka

dam-ba-KHud ghar se alag jhok basa li us ne

itna madum hua wo ki nazar se bichhDa

lams ki yaad bhi poron se uTha li us ne

jism ke par meri ruh talak sannaTa

hijr ki rakh mein miTTi meri Dhaali us ne

mom-batti ke muqabil mein biTha kar us ko

khinch li phir koi taswir misali us ne

munkashif ho gaya ek aur mohazzab lamha

KHud jala kar bhi meri rakh sanbhaali us ne

main samaat ka hunar bhul hi jaun na 'sahar'

chhu ke dekhi hai mere kan ki baali us ne