mujh tak nigah aai jo wapas palaT gai

mujh tak nigāh aa.ī jo vāpas palaT ga.ī

phailā jo merā shahr to pahchān ghaT ga.ī

maiñ chup rahā to aañkh se aañsū ubal paḌe

jab bolne lagā mirī āvāz phaT ga.ī

is kā nahīñ hai rañj ki taqsīm ghar huā

phūloñ bharī jo bel thī āñgan meñ kaT ga.ī

jiine kī ḳhvāhishoñ ne sabhī zaḳhm bhar diye

āñkhoñ se ashk mez se tasvīr haT ga.ī

dast-e-bahār-e-rañg ne ḳhushbū bikherī thī

phir apne aap phuul se titlī lipaT ga.ī

manzar jo chāhtā huuñ vahī dekhtā huuñ maiñ

maiñ kyā karūñgā 'shāz' jo ye dhund chhaT ga.ī

mujh tak nigah aai jo wapas palaT gai

phaila jo mera shahr to pahchan ghaT gai

main chup raha to aankh se aansu ubal paDe

jab bolne laga meri aawaz phaT gai

is ka nahin hai ranj ki taqsim ghar hua

phulon bhari jo bel thi aangan mein kaT gai

jine ki KHwahishon ne sabhi zaKHm bhar diye

aankhon se ashk mez se taswir haT gai

dast-e-bahaar-e-rang ne KHushbu bikheri thi

phir apne aap phul se titli lipaT gai

manzar jo chahta hun wahi dekhta hun main

main kya karunga 'shaz' jo ye dhund chhaT gai