mujhe bhi paDh lo ki harf-e-sawab ban jaun

mujhe bhī paḌh lo ki harf-e-savāb ban jā.ūñ

varaq varaq huuñ kisī din kitāb ban jā.ūñ

mire baġhair bhī kuchh din guzār le ai dost

na itnā pī ki maiñ terī sharāb ban jā.ūñ

baḌhā na fāsle har roz ajnabī kī tarah

na yuuñ bulā ki maiñ tujh par azaab ban jā.ūñ

kiyā thā tū ne to raushan charāġh kah ke mujhe

ye merā hausla maiñ āftāb ban jā.ūñ

kahāñ ye sochā thā ghabrā ke jis se niklā huuñ

phir ek din usī jangal kā ḳhvāb ban jā.ūñ

bulā rahī haiñ mujhe duur kī havā.eñ 'aah'

ye lag rahā hai ki ḳhāna-ḳharāb ban jā.ūñ

mujhe bhi paDh lo ki harf-e-sawab ban jaun

waraq waraq hun kisi din kitab ban jaun

mere baghair bhi kuchh din guzar le ai dost

na itna pi ki main teri sharab ban jaun

baDha na fasle har roz ajnabi ki tarah

na yun bula ki main tujh par azab ban jaun

kiya tha tu ne to raushan charagh kah ke mujhe

ye mera hausla main aaftab ban jaun

kahan ye socha tha ghabra ke jis se nikla hun

phir ek din usi jangal ka KHwab ban jaun

bula rahi hain mujhe dur ki hawaen 'ah'

ye lag raha hai ki KHana-KHarab ban jaun